Mercado libros día 23 abril

 Hoxe, como xa é habitual cada 23 de abril, celebramos o noso mercadiño de libros no que o alumnado puido intercambiar libros do seu gusto e interese e gozar así de novas lecturas. Fixémolo no souto acompañadas de 3 alumnos de 4º ESO que puxeron a ambientación musical. Grazas pola vosa participación e seguide lendo!!!!!

CLUB DE LECTURA CON SARA VILA

 O venres 10 de abril tivemos o encontro literario con Sara Vila e o seu libro O incendio. Celebrámolo xantando con ela en Salceda e fomos debullando a historia da protagonista adolescente. Ela mesma narra os acontecementos previos a un devastador incendio que arrasa Neboeiro, a aldea da súa avoa, e cambia a súa vida para sempre. Con tenrura e linguaxe viva e directa asistimos á súa transformación a adulta lembrando experiencias vitais que a marcaron. Foi un encontro ameno do cal gozamos moito. Agradecemento especial a Sara Vila por ter vido. Aí vos van as fotos.

APADRIÑAMENTO LECTOR CO ALUMNADO DO CRA ALTAMIRA

 Onte, xoves 26 de marzo, en relación coa semana da prensa volvemos repetir a experiencia do curso pasado "Apadriñamento lector". Desta volta fomos ao CRA Altamira co alumnado do club de lectura para lerlles un conto aos nenos e nenas das aulas de 5 anos. Despois da lectura intercambiaron un debuxo feito por eles e elas e tamén conversaron. Volveu resultar unha experiencia moi enriquecedora xa que ademais algúns e algunhas volveron reencontrarse coas súas profes de infantil. Contamos repetir o próximo curso. As fotiños que vos achegamos son boa mostra do ben que o pasamos. 

📚😊

DÍA DA POESÍA

 Co gallo da celebración do Día da Poesía o 21 de marzo creamos un poema a partir de títulos de poemarios e propuxemos ao alumnado e profesorado que fixesen o seu do mesmo xeito e nolo fixesen chegar. Agardamos que vos guste e creade o voso texto. Viva a poesía.

SESIÓN DE MARZO

 

    Onte 9 de marzo reunímonos no club de lectura de 1º de ESO para intercambniar as nosas impresións tras a lectura da obra teatral La foto de los mil me gusta de Nando López. En xeral faltoulles máis contido e algo de "chispa" dentro da obra e comentaron os diferentes personaxes. Tamén comezamos a preparar os contos que lles van ler aos alumnos e alumnas de infantil do CRA Altamira, o noso cole adscrito, nunha nova edición do apadriñamento lector que xa fixemos o curso pasado. Tamén decidimos que a próxima lectura sería Heartstopper en banda deseñada. 

Aquí vos deixamos unha mostra da sesión. 

TAMÉN LEN DE MARZO

 O día 9 de marzo tivemos o noso Tamén Len, desta vez coa presenza de César Núñez, músico salcedense e pai de dúas alumnas que cursan 4º da ESO. Actualmente é profesor de tuba no Conservatorio Profesional de Música de Santiago de Compostela e director da Sociedade Musical Lanhelense, perto de Caminha, en Portugal. Escolleu como lectura o relato "Mans coma nubes" de Rosa María Llorente Suárez, do libro Obras breves de imaxinación (Premios de Relatos "Mulleres Progresistas 2007-2011"). Resultou unha sesión moi agradable na que ademais se falou de música. Aquí vos vai unha mostra gráfica.