31/3/15

As 10 mellores curtametraxes sobre libros

http://www.taringa.net/post/animaciones/18576667/Los-10-mejores-cortometrajes-sobre-libros.html

Neste enlace van algunhas curtas consideradas das mellores sobre as experiencias que se poden vivir a través dos libros..., tan suxestivas e amplas como cada un queira!

Boas vacacións!!

24/3/15

FALADOIRO DE ACTUALIDADE. Sexo e xénero. A situación da muller no mundo actual.

Os días 18 e 19 de marzo, inauguramos unha nova actividade -o Faladoiro de Actualidade- pensada en orixe para dinamizar a Sala de Prensa, pero que superou a idea inicial porque ao final foi na sala da Biblioteca onde realizamos esta exitosa primeira "saída á palestra" do alumnado de 3º e 4º.

Dende Dinamización de Biblioteca, e coa inestimable colaboración do Dpt. de CCSS, pensouse a mellor maneira de organizar un ciclo de debates

mensuais, repartidos en varios recreos ao longo dunha semana, onde o protagonismo absoluto o tivera o alumnado, para falar e analizar temas de actualidade que fosen do seu interese. Para tal fin, procedeuse a repartir información a cada alumno/a de 3º e 4º, explicando en que consistía a actividade, que sería voluntaria, aínda que se valoraría a participación nela para as materias de historia, xeografía e ética; ademais serían eles quen elixirían os temas a tratar, dunha lista orientativa que lle proporcionamos e na que tiñan que engadir os que considerasen do seu gusto. Un bo número de alumnxs mostrouse atraído dende o principio -contamos coa participación de 62 persoas- elaboramos o listado de temas e empezamos polo máis votado por elxs: "Sexo e xénero. A situación da muller no mundo actual".

Decidimos organizalo repartindo primeiro un dossier con documentos relacionados co tema a tratar, escollendo a 4 alumnxs de 4ºESO para preparalo a fondo e presentalo ante o resto dos compañeirxs. Un deles guiaría a presentación xeral, outra compañeira faría de moderadora, pero tamén puntualizaría cada punto destacado dándolle pé a intervir ao compañeiro e á compañeira que asumirían os roles enfrontados -pro e contra- como procedemento que axudaría a dinamizar o debate e a saber atopar os argumentos requeridos; namentres que o público podería intervir sempre que o considerase, procurando respectar sempre o turno de palabra, sabendo falar e escoitar.

A pesar de que se retrasou por mor das avaliacións, dos resfriados e de encontrar o mellor momento, por fin nos lanzamos a esta nova aventura para aprender a debater e a coñecer e analizar a apaixonante e complexa realidade que nos rodea. Na primeira sesión os nervios estiveron a flor de pel, pero na segunda parte xa estaban todxs afeitos a esta dinámica que nos descubriu dotes de comunicadores, de polemistas, de reflexións e argumentos ben acaídos, e do logro dun ambiente propicio para a dialéctica.

Noraboa e grazas a todxs pola vosa actitude

e pola vosa participación!!

20/3/15

PRIMAVERA, ECLIPSE E CALOR

Certo é que hoxe foi un día ben especial: a primavera entrou ao grande, saímos ao aire libre, o caloriño calou nos nosos miolos e, ademais, poidemos contemplar un eclipse de sol en día festivo. Que máis se pode pedir?!

En Vigo tivemos a oportunidade de acudir ao paseo da praia do Vao, onde a Asociación Astronómica Rías Baixas, Astrovigo e Fundación Ceo e Cultura puxeron á nosa disposición os utensilios idóneos para contemplar os astros. A pesares de ter que madrugar, o ambiente era magnífico, relaxado, falando con uns e outros, vendo os diferentes aparellos feitos por afeccionados tamén; nenos xogando, pero tamén interesados no eclipse, unha mañá para disfrutar, pasear pola beira do mar, sentir a calor e facer unha chea de amables fotos ben compostas, que quedan como testemuño da cantidade de dispositivos que nos acompañan no día a día nesta modernidade que vivimos.

A Asociación Astronómica Rías Baixas ten unha boa páxina (aquí enlazada) para quen estea interesado/a nestes temas. Pablo Martínez Alemparte axudounos a entender mellor o eclipse e a captalo adecuadamente, ademais de enterarnos de que dá charlas sobre temas de astronomía en centros escolares. Así que, xa sabedes, non temos máis que poñernos en contacto a través da páxina web e organizar dita visita para que veña a compartir connosco todo o que sabe sobre o "firmamento"... Pensarémolo como posible actividade a realizar!

(Por certo, a imaxe que abre esta presentación de diapos é a que leva Pablo Alemparte na súa camiseta, deseñada en exclusiva pola súa propia irmá, iso contounos).

17/3/15

PREMIO FRANCISCO FERNÁNDEZ DEL RIEGO ÁS BIBLIOTECAS ESCOLARES DE GALICIA.

Premio "Francisco Fernández del Riego á colaboración no ámbito editorial e cultural" para Bibliotecas Escolares de Galicia.

Estamos de noraboa por este premio recibido á laboura de moitas persoas empeñadas en poñer en funcionamento e dinamizar as Bibliotecas Escolares e, por suposto, queremos compartilo con todxs vós.

http://www.editoresgalegos.org/gl/actualidad/novas/amosar/id/5595

http://www.edu.xunta.es/biblioteca/blog/?q=node%2F764

11/3/15

LABORATORIO DO BO AMOR: RECURSOS.

Aquí temos unha serie de recursos interesantes que nos axudarán a pensar e revisar o concepto e a experiencia do amor e das relacións. Iremos seleccionando textos, videos, cancións, imaxes..., e calquera de vós pode recomendarnos máis referencias de interese para engadir. Ademais de ser recursos idóneos tamén para celebrar dende esta óptica o mes da Muller.

Por certo, estade atentxs porque a semana que vén, a través da Radio Escolar, faremos un programa especial:

"OS 40 PRINCIPAIS"

para dar a coñecer as letras destas cancións seleccionadas -e aínda quedan moitas- que nos parece que gardan mensaxes positivas referidas ás relacións sentimentais... Tratarase de que cada un de vós elixa a súa favorita, valorando a letra e a música, e así veremos como se van situando na lista as máis votadas. Para tal fin, instalaremos un buzón no corredor onde as meteredes.

E non deixedes de ADICARLLE esa canción preferida a quen cada un considere, con elas nutriremos unha serie de programas que esperamos que vos resulten atractivos. Neste post atoparedes cancións ao principio, pero non deixedes de ver as que enlazamos tamén na parte final.

A seguinte semana, tamén nos programas de Radio, destacaremos e comentaremos as Fórmulas de Amor expostas no corredor, pero diso xa falaremos noutro post.

-Artigos:
-http://www.eldiario.es/sociedad/felices-comieron-perdices_0_100790238.html

-http://www.laopinioncoruna.es/sociedad/2015/02/22/sexismo-nueva-generacion/930262.html

-http://www.pikaramagazine.com/2015/02/menos-guerras-romanticas-y-mas-amor-por-favor/

-https://www.diagonalperiodico.net/cuerpo/24379-menores-transexuales-invisibles-y-sin-derechos.html

-Cancións:

https://www.youtube.com/watch?v=4GzovNFRRY4

Canción de Pablo Milanés con Gal Costa: Ámame como soy.

https://www.youtube.com/watch?v=nb8fwUZnP0I

Canción de Sés no seguinte vídeo: Non son fada nin princesa:

-Imaxes:

-http://www.elcultural.es/noticias/arte/Mads-Nissen-gana-el-World-Press-Photo/7403

La foto ganadora del World Press Photo: Jon and Alex de Mads Nissen. 2015

-Destacamos o que se deu en chamar "micromachismos", é dicir, actitudes cotiás, case invisibles, que cremos aceptables e non o son, porque agochan síntomas de machismo, desigualdade, dominio, submisión... Van estas campañas e os enlaces aos vídeos seguintes:

http://www.elcorreogallego.es/vivir-hoxe-galicia/ecg/el-bng-inicia-una-campana-contra-el-micromachismo-porque-la-violencia-contra-las-mujeres-no-son-solo-golpes/idEdicion-2014-11-05/idNoticia-899473/

http://www.afundacion.org/es/socialia/noticia/campana_de_fiadeiras_para_denunciar_os_micromachismos

https://www.facebook.com/video.php?v=870830756273493&fref=nf Vídeo.

http://llegalaultima.com/2014/04/26/feminismo/ Publicidade.

-Vai tamén o enlace ás antigas entrada deste blog que fixemos en decembro, en relación ao tema do Bo Trato, onde constan cancións e videos..., ademais de rescatar para vós tamén esta presentación con fermosos poemas: "O Amor está nos Libros"

http://www.slideboom.com/presentations/105658/o-amor-esta-nos-libros

http://biblosvivos.blogspot.com.es/2014/11/recursos-para-analizar-e-traballar-os.html
http://biblosvivos.blogspot.com.es/2014/11/mais-recursos-ao-redor-da-violencia-de.html

8/3/15

TAMÉN LEN CO ANTIGO ALUMNO PABLO CABALEIRO

O pasado xoves día 5, varias alumnas e alumnos de 4ºESO presentaron ao noso convidado, Pablo Cabaleiro, e así foi como soubemos que é salcedense, estudou connosco, fixo bacharelato de Humanidades e despois un Ciclo superior de "Dirección en Servizos de Restauración". Dende novo, aprendeu o oficio no Bar Restaurante dos seus pais, no centro da vila, e no último ano independizouse e abriu o Café "Plaza" ao seu carón, co seu tío como socio.

Como Pablo estaba no seu día libre, comezamos poñendo a mesa e servíndolle como alimento o libro de Manolo Rivas, Que me queres amor?, que el mesmo pediu entre o "menú", e de bebida

-auga, claro!-

DEspois da clara e acertada lecturas de Pablo, os "camareiros e camareiras" dispuxéronse a servir viandas variadas e apetecibles para todxs nós, nesta hora do recreo.

Elixiu este libro, porque Manolo Rivas -e este libro en concreto- é o que máis recorda e o que máis lle marcou, e por ser un autor de referencia e relacionalo con anécdotas do seu tempo de estudante, ...que non quixo desvelar.

Foi interesante a súa conversa posterior, porque demostrou ter unha madurez e filosofía da vida que, en relación ao seu oficio, relaciona con saber dar o mellor trato, coa discreción como máxima para non ter conflitos cando se traballa de cara ao público. Pensa: "Ti escoitas, miras, pero nin entendes nin sabes", ou o que é o mesmo, "o cliente ten a razón". Explícanos que estudar axuda moito para aprender o oficio, porque así é como se sabe dar o mellor trato, ter don de xentes, ter cultura para poder manter conversas. El vese como alguén que valora os clientes e sabe que non se deben tocar certos temas, aínda que os habituais sexan o fútbol, a política e pouco maís, di.

Rematou cun agradecemento aos profes que lle axudaron e aconsellaron estudar e formarse.

E de sobremesa, agasallámolo co primeiro disco de "BATEMENTO", grupo de música que vén de editar a súa obra recentemente, composto por dous antigos alumnos a quen tamén lles damos a noraboa, Aitor e Christian.

28/2/15

Certame Literario: FÓRMULAS DE BO AMOR.

“LABORATORIO DO BO AMOR”

Para conmemorar o Día dos Namorados, convocamos un concurso de escrita dende a Biblioteca Calixtina, en colaboración cos Dpts. de CCNN e Lingua Galega, coa idea de animarvos a expresar o que pensades en positivo sobre as relacións amorosas, que ingredientes ou “fórmulas” son as indicadas para que o “experimento” teña un final feliz. Ademais, podedes expresarvos en calquera lingua que dominedes.

Sabendo que estamos condicionados moitas veces por unha maneira errrada de entender as relacións interpersonais e sentimentais, cremos que é importante facer una reflexión sobre os “asuntos do corazón”; por iso queremos aproveitar a ocasión para idear e construír un mural onde plasmar un particular “LABORATORIO DO AMOR”, e onde a “Química do AMOR” quede enchida dos efluvios desprendidos dos experimentos que cada un de nós é quen de formular cos “ingredientes esenciais”. Creando as mellores “FÓRMULAS DE BO AMOR”.

Formular é receitar, prescribir, manifestar, expor con claridade e precisión. Unha fórmula é un medio práctico para resolver un asunto complicado, é una receita na que se indican os elementos que se deben empregar na curación de algo ou alguén, é una expresión matemática que resume os cálculos necesarios para a resolución dun problema e que serve como regra de uso para eses casos, é a representación simbólica, mediante letras e números, da composición dunha substancia química. É, ante todo, pensar a mellor das vidas para cadaquén, e para todxs, porque tamén podemos pensar o que hai, no amor, de colectivo…

Unha vez aclarado o que debemos facer, poñámonos a inventar e formular as mellores receitas para acadar o BO AMOR, non esquezamos que a experiencia vale un grao (como adoita dicirse), e teñamos en conta o que sabemos que funciona e o que non, por iso é moi importante elixir ben os elementos que provocan reaccións positivas e deixar fóra os que orixinan reaccións negativas, explosiónsssssssss destrutivas!!!!

Lembrade os conceptos que relacionamos co BO TRATO e que están expresados no seu mural: respecto, igualdade, dignidade, liberdade, amizade, equilibrio, benquerencia, amabilidade, compañeirismo, agarimo, compromiso, empatía, lealdade, coidado, asertividade, solidariedade, feminismo, comprensión, bo amor…, e deixemos fóra os negativos, que todxs sabemos cales son…, non si?

Paralelamente, ofreceremos neste blog, certos recursos relacionados, que poden servir para acadar unha boa educación sentimental: textos, videos, cancións, poemas… Ademais de poder adicar tamén cancións ou música na RADIO ESCOLAR, seguindo a liña do Bo Amor.

-------------------- * --------------------

BASES DO CONCURSO “FÓRMULAS DE BO AMOR”

Podedes participar no CONCURSO “FÓRMULAS: A QUÍMICA DO BO AMOR”, ao longo deste trimestre de primavera que asoma, para pensar nas mellores receitas ou fórmulas para acadar fantásticas, magníficas, marabillosas, en definitiva, boas relacións sentimentais.

Para iso non tedes máis que formulalas así, por exemplo:

A = I + R

-Especificando que: A é amor, I é igualdade, R é respecto; usando as variantes e elementos que consideredes esenciais na fórmula que queredes proponer e compartir.

-E usando calquera letra, número, símbolo, signo.

-Dándolle un ton poético ou científico, fantástico ou realista …

-En calquera lingua que dominedes.

-Serán escritas sobre corazóns de cores seguindo este modelo:

(recortades un corazón no material e cor que queirades (como moi grande folio A4, ou menos)onde escribiredes a vosa fómula, ese corazón terá outra parte en forma de ronsel ou etiqueta a un lado, onde explicades a clave para entender dita fórmula)

-Que presentaredes sen nome, cun pseudónimo escrito por detrás, cos datos en sobre pechado e por fóra só ese pseudónimo ou sobrenome. Entregaranse nos recreos na Biblioteca, ata o 12 de marzo.

-Unha vez formuladas colocarémolas no “LABORATORIO DO AMOR”, para ser “estudadas e experimentadas e ver a súa efectividade”.

-Será premiada a fórmula mellor valorada polo xurado, que estará composto por expertxs na “Ciencia do Bo Amor”.

-O PREMIO consistirá nunha CEA ROMÁNTICA PARA DOUS…

ANIMÁDEVOS E NAMORÁDEVOS BEN!!!!

21/2/15

VIÑETAS: UNHA OLLADA Á PAZ

Non quixemos deixar pasar a ocasión de celebrar o Día da Paz o 30 de Decembro, para botarlle "unha ollada á Paz", solidarizarnos en contra de toda violencia e a favor da liberdade de expresión. Por iso convocamos este concurso de viñetas, cuxo resultado foi a presentación de traballos variados, destacando a creatividade de moitos deles a partir de reflexións ben interesantes. A elección do mellor non é doada, o xurado terá dificil decidir...

"La Muralla" poesía de Nicolás Guillén, poeta cubano,

interpretada por Ana Belén.

18/2/15

TEMPO DE ENTROIDO; "O Mundo Patas Arriba"

Venres de Entroido, ou Carnaval, en Salceda. Chove. Decisión: saímos e desfilamos igual aínda que chova. Debecemos por sentir a calor nestes tres días que preceden á Coresma, pero se resiste o "maldito tempo" sen darnos tregua; porén lanzámonos baixo as nubes e sobre o asfalto mollado que multiplica as cores co seu reflexo e redobra a ledicia, ao que engadimos paraugas de mil cores e globos de cor violeta reivindicando melloras no servizo pediátrico do municipio.

O mundo "patas arriba", a ilusión de trastocar a realidade, transgedir, darlle a volta ás identidades, compartilo todo nunhas horas, poñer en ridículo a quen detenta o poder, facer coplas cos erros dos mandatarios, das autoridades competentes, e das miserias de uns e outros, ou de todxs nós...

Deixar atrás o inverno e anticipar a entrada da primavera que uliscamos no ambiente entre as mimosas floridas... Carnaval de carne, de praceres, de alimentos renovados nas vendimas e colleitas e matanzas, onde conviven sen maior conflito o entroido rural máis ancestral coas novas formas foráneas, importadas de Tenerife, de Brasil ou nin se sabe...; onde nenxs e vellxs, homes e mulleres, danzamos ao son dos variados instrumentos e músicas do mundo, de aquí e de acolá, soberbia mestizaxe, mascaradas, mascaritas, monicreques, choqueiros, monigotes, damas e cabaleiros, mecos e sardiñas enterradas ...no mar.

Aquí estamos resistindo... Pan e saúde!!!

17/2/15

DESCUBRE A BIBLIOTECA!!:

Dende o PRINT de 1º ESO queremos convidarvos a seguir as pegadas de cores e as palabras significativas que tentan expresar todo o que de pracenteiro ten a visita a espazos como a nosa biblioteca e a "fisgar" entre as páxinas dos libros; para descubrir unha Biblioteca "En Pé de Igualdade" que pretende dar a oportunidade de ofrecer mil e un recursos e actividades abertas a todas e todos.

PASEN E VEXAN PEGADA A PEGADA...

Engadimos un video con este percorrido, que leva ata o muro que anuncia a entrada á Biblioteca, onde a xeito de graffiti plasmamos os obxectivos que pretendemos acadar.

Montaxe final de Rubén e música de "Los Coronas"

14/2/15

BO TRATO: POSTA EN ESCENA

Por fin fomos quen de levar a termo o plan proposto de implicar a todo o instituto -aula por aula- ademais de contar coa colaboración do Club de Lectura e do profesorado e demais adultos do Centro, que quixeron participar animados na montaxe dunha posta en escena por cada un dos grupos para posicionarnos en defensa do BO TRATO, partindo de ideas e actitudes pensadas sempre en positivo.
Dende Biblioteca, Print, Orientación, Titorías, Ética e Edu. Cidadanía, estivemos especialmente implicadas para encauzar, compartir e consensuar as ideas que ían xurdindo nas diferentes aulas e darlles forma para fotografar. Houbo certas demoras e retrasouse máis do debido, pero o obxectivo era facelo con todo o alumnado e persoal do centro.

O interesante é que deste xeito participamos todas e todos e a verdade é que houbo variedade de propostas e de boas ideas para plasmar en cada fotografía.

Deixamos enlace ao post do blog dos SiareirosdaPalabra, onde colgamos tamén o video feito:

... EnLEate co BO TRATO!

Nunha entrada anterior explicamos xa a dinámica da actividade, agora só queremos deixar constancia gráfica e que filtre nos poros de cadaquen esta mensaxe;

pois unha imaxe e un bo lema valen máis que mil palabras...

1/2/15

PRINT: "EN PÉ DE IGUALDADE". ACTIVIDADES REALIZADAS.

"EN PÉ DE IGUALDADE" é o lema que guía as actividades e labouras de aprendizaxe que este curso levamos facendo dende a Biblioteca Calixtina na hora do PRINT, nos 3 grupos de 1º ESO, coa Formación de Usuarios e a Educación Documental e Dixital.

Comezamos cun achegamento á nosa Biblioteca, á súa organización, a aprender a moverse por ela e a ter información de todas as actividades que nela podemos facer todxs participando abertamente. Sempre hai alumnado de 1º ESO que se brinda para colaborar voluntario nos recreos e quen tamén nutre as filas do Club de Lectura.

Sensibilizamos ante aspectos e circunstancias que consideramos de base para formar parte da nosa sociedade, coas súas complexidades, e para aprender a entender a realidade; pero sobre todo, o noso obxectivo é basear as actividades ou investigacións que fagamos na consecución da igualdade e o respecto entre homes e mulleres, entre grupos sociais, entre diversas culturas, na busca dunha convivencia positiva en liberdade.

No 1º Trimestre, cada grupo participou en 2 actividades:

1-Elaboración de ESLOGÁNS de creación propia que escribimos sobre pés de cores para poñer dende a entrada do instituto, todo seguido pola parede do corredor, ata a porta da Biblioteca, animando a usala e á lectura... Estas pegadas tan animosas acaban diante dun "MURO cun GRAFFITI para descubrir unha BIBLIOTECA que: le, ecoita, fala, comprende, coopera, abre, oferta recursos, colabora, escribe, visita, acolle, cuestiona, indaga, curiosea, debate, iguala, respecta...; sendo este un bo xeito de transmitirlles e analizar con eles os obxectivos e a identidade da nosa BE. Agradecemos a Nacho, profe de plástica a súa colaboración e creatividade para materializar os nosos desexos e visións.

2-Tamén traballamos en cada grupo, na creación dun lema ou motivo no que basearnos en contra dos malostratos e da violencia, e comezamos a idear unha posta en escena -coas cores significativas violeta e laranxa, trastocando roles, defendendo a igualdade e o respecto para acadar a liberdade persoal- para facer unha foto de grupo sensibilizándonos e defendendo o BO TRATO, pensando en positivo, para participar despois no mural onde serán expostas todas as fotos, as de cada grupo do Centro. Están feitas xa e procederemos a amplialas para poder expoñelas neste mes.

25/1/15

MARCOS GÁNDARA NO TAMÉN LEN

Este pasado xoves 22 de xaneiro estivo entre nós Marcos Gándara, antigo alumno da 1ª promoción que cursou 4º ESO no IES Pedras Rubias. Dende aquela xa tivo tempo de estudar a carreira de Historia Contemporánea, Estudos americanos e Arquivística, facer un Máster de "Xestión Cultural" en Lugo e mostrar inclinación por diversas actividades. Na actualidade leva xa varios meses contratado polo Concello de Salceda para dinamizar varios proxectos culturais: ampliación do Arquivo da Imaxe (do que se está a crear unha páxina web onde colgar cantas imaxes se poidan recoller a través de todas as persoas que queiran contribuír para rescatar o patrimonio fotográfico local), ou posta en marcha dun Club de Lectura vinculado á Biblioteca Municipal, para o que nos pedira asesoramento e exemplares de libros á Biblioteca Escolar do noso Centro; intercambio de ideas que fixemos e seguiremos a facer gustosamente.

Colabora en prensa (Galicia Confidencial) e revistas online, como Iwrite magazine, Hypérbole magazine; escribindo artigos sobre cultura, historia, futbol...; ademais de ter publicado tamén algún relato de ficción. Deste xeito, para compartir connosco elixiu un relato da súa autoría, que fixera por encargo, titulado "Volver a empezar" onde conta unha historia no contexto dunha sociedade de futuro indesexable, distópica. Podemos dicir que é una persoa inquieta, crítica e comprometida e que sabe mover o público e cuestionalo sobre a lectura que escoitamos, falando sobre as sociedades hipercontroladas, compartindo deste xeito un recreo moi interesante. (Deixamos enlaces ás revistas e ao relato clikando enriba deles).

A presentación do acto -como non- correu a cargo de varias Siareiras da Palabra do noso Club de Lectura: Alba e Lucía, e das notas do 2º movemento de "O inverno" de Vivaldi, interpretadas tamén por membros do noso Club: Bieito, Pablo, Carmen e Camila, trombón, trompa e flautas. Houbo un amable e nutrido público atento ao acto, a quen agradecemos sempre a súa presenza incondicional.

20/1/15

BO TRATO: CONTRA TODO TIPO DE VIOLENCIA // EN DEFENSA DA CONVIVENCIA PACÍFICA ENTRE IGUAIS

No trimestre anterior comezamos a andaina para promocionar o BO TRATO, primeiro contra a violencia machista, agora en defensa dunha convivencia pacífica que respecte a diversidade e a igualdade, e seguiremos esta liña vermella en febreiro para reflexionar sobre o sentimento e a experiencia do BO AMOR.

-EN DECEMBRO, no corredor creamos un espazo de BO TRATO, onde desgranar os conceptos esenciais relacionados sobre os que traballar: igualdade, respecto, dignidade,
liberdade, compromiso, benquerencia, amizade, compañeirismo, cooperación, feminismos, asertividade, empatía, equilibrio, comprensión...

e a un lado deixamos o espazo que iremos armando coas fotografías feitas de cada grupo de alumnos e alumnas, por curso, ademais de unir a elas as do Club de Lectura e a das persoas adultas que traballamos neste Centro de Ensino: conserxe, administrativo, profes, encargada da cafetaría..., para poñer en evidencia o noso rexeitamento ante o maltrato, pero dende unha postura positiva como é a promoción do bo trato. Así cada grupo reflexionou sobre este asunto e chegou a unha idea, un eslogan ou unha imaxe nas que basear a súa posta en escena comprometéndose todas e cada unha das persoas que aquí convivimos. Será agora en Xaneiro cando deamos colocado cada unha das fotografías ampliadas para completar o noso muro do BO TRATO. Por suposto que tamén creamos, a carón, un punto atractivo e cómodo para poder ollar os diferentes libros e filmes que recomendamos relacionados con esta temática.

-EN XANEIRO, e dado que estamos sendo asaltados por feitos violentos cada dous por tres, non queremos deixar pasar a ocasión de sensibilizarnos, implicarnos e facer unha reflexión a través dun CONCURSO DE VIÑETAS: UNHA OLLADA Á PAZ.

CONCURSO DE VIÑETAS

PARA UN XANEIRO DE PAZ

A biblioteca calixtina convoca:

Viñetas: unha ollada á paz

relacionadas:

coa defensa da paz, do respecto, da liberdade de expresión, da convivencia na diversidade, da capacidade de ser críticos e de ter as mentes abertas, de defensa e valoración do humor gráfico…

bases:

quen así o desexe pode presentar unha viñeta de creación propia, orixinal, con liberdade de estilo, nun formato sobre papel (ou calquera outro material) de tamaño a4, Baixo pseudónimo escrito por detrás do traballo e os datos persoais (nome completo e curso) en sobre pechado só co pseudónimo (nome falso) por fóra.

prazo:

entregaránse(traballo e sobre) nos recreos na biblioteca ao longo deste mes de xaneiro e ata o día 29, para poder ser expostos

o día 30 de xaneiro, día internacional da paz

1º premio: -agasallo dun libro ilustrado ou de bd.

Animádevos a participar!!!!

-EN FEBREIRO, seguiremos esta liña de actuación para educar no BO AMOR, e facer unha necesaria análise do sentimento amoroso e os seus usos e abusos, malentendidos, sufrimentos, dependencias, etc.; coa finalidade de aprender a vivir os nosos sentimentos e paixóns dun xeito -a poder ser- equilibrado. Faremos un mural da "FÍSICA E QUÍMICA DO AMOR" e convocaremos para a ocasión un CONCURSO DE FÓRMULAS DE BO AMOR, para exercitar a expresión escrita.