ÚLTIMA SESIÓN CLUB LECTURA 1º ESO

     Hoxe tivemos a última reunión deste curso do club de lectura de 1º ESO a cal quedara pendente de realizarse no mes de maio debido a imprevistos. Comentamos o libro Bruxas e dragóns, unha xenial aposta lúdica e literaria de Ledicia Costas. Resultou unha lectura "sorprendente, intrigante, máxica, aventureira, emocionante e moi entretida" en palabras das nosas ávidas lectoras. Unha lectura que leva por diferentes camiños segundo a escolla que vaian facendo os e as lectoras. Ademais, nesta sesión, fixemos xa propostas de actividades e títulos para o próximo curso e valoramos de xeito xeral as lecturas que fixemos ao longo do curso, as que máis e menos gustaron. Por ser o último encontro tivemos unhas sobremesas gorentosas para acompañarnos. Agardamos que o próximo curso sigamos gozando co noso club e que vos unades a el. Aí vos vai unha fotiño do encontro. 💜📙

APRENDENDO PAPIROFLEXIA

 Este xoves 28 de maio o noso alumno de 1º ESO, Pablo, estivo ensinándonos a facer papiroflexia. O tempo fíxose escaso polo que seguiremos en xornadsa próximas gozando desta actividade creativa e enriquecedora. Aí van as fotiños:

ENCONTRO DE 4º ESO CO ESCRITOR ÁLEX ALONSO

 O martes 26 tivemos o pracer de recibir ao escritor Álex Alonso. Reuniuse co alumnado de 4º ESO para conversar arredor da súa obra Bullying, a cal fai unha profunda reflexión sobre o tema do acoso xuvenil. Escritor e alumnado intercambiaron impresións sobre a obra e resaltaron a importancia da actuación da contorna próxima daquela persoa que estea a sufrir acoso.  O alumnado tamén puido facer preguntas ao autor e coñecer así a súa traxectoria literaria. Resultou un encontro ameno e moi interesante e agardamos xa para ler a seguinte obra que del nos chegue. Tedes aquí unha mostra gráfica do acto. 

ÚLTIMO TAMÉN LEN DO CURSO

 O pasado venres 22 de maio tivemos o pracer de asistir á última sesión  do curso do noso Tamén Len. Foi un pracer inmenso gozar da compañía da nosa Loli Calvo, profesora neste centro durante vinte anos e que se xubilou recentemente. Presentounos todo un clásico necesario O Principiño e fixo a lectura dun fragmento marabilloso do cal quixo deixarnos unha frase especial: "Só co corazón se pode ver ben, o esencial é invisible aos ollos". Puxemos así un peche de ouro ás edicións deste curso acompañados e acompañadas dun referente deste centro que sempre levaremos no corazón. Grazas Loli por ser tan especial. 

ENTREGA DE PREMIOS CONCURSO DE POESÍA

 Onte tivemos o pracer de entregar os premios do concurso de poesía ás nosas catro gañadoras. Tres alumnas e unha profesora que nos agasallaron cos seus fermosos textos. Moitas grazas pola participación!!! E sigamos creando poesía!!!!

EXPOSICIÓN DE XOGOS CON MATERIAIS RECICLADOS

Grazas ao noso alumnado pola súa creatividade!!!! Aquí podedes ver que fantásticos xogos con materiais reciclados construíron. Animádevos a facer o mesmo!!!

LETRAS GALEGAS 2026: MARATÓN DE LECTURA

Como xa é habitual, onte celebramos unha das actividades da semana das Letras Galegas no noso souto: o maratón de lectura. A autora homenaxeada este ano é Begoña Caamaño polo que fixemos a lectura de Morgana en Esmelle durante toda a mañá. Grazas a todo o alumnado e profesorado participante por poñer voz a esta historia e achegarnos un pouquiño da obra de Begoña. Aquí vos deixamos as fotos. 

NOVIDADES

 Continuamos actualizando a colección da biblioteca.