biblosvivos: día dos namorados

Mostrando entradas con la etiqueta día dos namorados. Mostrar todas las entradas

11/3/15

LABORATORIO DO BO AMOR: RECURSOS.

Aquí temos unha serie de recursos interesantes que nos axudarán a pensar e revisar o concepto e a experiencia do amor e das relacións. Iremos seleccionando textos, videos, cancións, imaxes..., e calquera de vós pode recomendarnos máis referencias de interese para engadir. Ademais de ser recursos idóneos tamén para celebrar dende esta óptica o mes da Muller.

Por certo, estade atentxs porque a semana que vén, a través da Radio Escolar, faremos un programa especial:

"OS 40 PRINCIPAIS"

para dar a coñecer as letras destas cancións seleccionadas -e aínda quedan moitas- que nos parece que gardan mensaxes positivas referidas ás relacións sentimentais... Tratarase de que cada un de vós elixa a súa favorita, valorando a letra e a música, e así veremos como se van situando na lista as máis votadas. Para tal fin, instalaremos un buzón no corredor onde as meteredes.

E non deixedes de ADICARLLE esa canción preferida a quen cada un considere, con elas nutriremos unha serie de programas que esperamos que vos resulten atractivos. Neste post atoparedes cancións ao principio, pero non deixedes de ver as que enlazamos tamén na parte final.

A seguinte semana, tamén nos programas de Radio, destacaremos e comentaremos as Fórmulas de Amor expostas no corredor, pero diso xa falaremos noutro post.

-Artigos:
-http://www.eldiario.es/sociedad/felices-comieron-perdices_0_100790238.html

-http://www.laopinioncoruna.es/sociedad/2015/02/22/sexismo-nueva-generacion/930262.html

-http://www.pikaramagazine.com/2015/02/menos-guerras-romanticas-y-mas-amor-por-favor/

-https://www.diagonalperiodico.net/cuerpo/24379-menores-transexuales-invisibles-y-sin-derechos.html

-Cancións:

https://www.youtube.com/watch?v=4GzovNFRRY4

Canción de Pablo Milanés con Gal Costa: Ámame como soy.

https://www.youtube.com/watch?v=nb8fwUZnP0I

Canción de Sés no seguinte vídeo: Non son fada nin princesa:

-Imaxes:

-http://www.elcultural.es/noticias/arte/Mads-Nissen-gana-el-World-Press-Photo/7403

La foto ganadora del World Press Photo: Jon and Alex de Mads Nissen. 2015

-Destacamos o que se deu en chamar "micromachismos", é dicir, actitudes cotiás, case invisibles, que cremos aceptables e non o son, porque agochan síntomas de machismo, desigualdade, dominio, submisión... Van estas campañas e os enlaces aos vídeos seguintes:

http://www.elcorreogallego.es/vivir-hoxe-galicia/ecg/el-bng-inicia-una-campana-contra-el-micromachismo-porque-la-violencia-contra-las-mujeres-no-son-solo-golpes/idEdicion-2014-11-05/idNoticia-899473/

http://www.afundacion.org/es/socialia/noticia/campana_de_fiadeiras_para_denunciar_os_micromachismos

https://www.facebook.com/video.php?v=870830756273493&fref=nf Vídeo.

http://llegalaultima.com/2014/04/26/feminismo/ Publicidade.

-Vai tamén o enlace ás antigas entrada deste blog que fixemos en decembro, en relación ao tema do Bo Trato, onde constan cancións e videos..., ademais de rescatar para vós tamén esta presentación con fermosos poemas: "O Amor está nos Libros"

http://www.slideboom.com/presentations/105658/o-amor-esta-nos-libros

http://biblosvivos.blogspot.com.es/2014/11/recursos-para-analizar-e-traballar-os.html
http://biblosvivos.blogspot.com.es/2014/11/mais-recursos-ao-redor-da-violencia-de.html

28/2/15

Certame Literario: FÓRMULAS DE BO AMOR.

“LABORATORIO DO BO AMOR”

Para conmemorar o Día dos Namorados, convocamos un concurso de escrita dende a Biblioteca Calixtina, en colaboración cos Dpts. de CCNN e Lingua Galega, coa idea de animarvos a expresar o que pensades en positivo sobre as relacións amorosas, que ingredientes ou “fórmulas” son as indicadas para que o “experimento” teña un final feliz. Ademais, podedes expresarvos en calquera lingua que dominedes.

Sabendo que estamos condicionados moitas veces por unha maneira errrada de entender as relacións interpersonais e sentimentais, cremos que é importante facer una reflexión sobre os “asuntos do corazón”; por iso queremos aproveitar a ocasión para idear e construír un mural onde plasmar un particular “LABORATORIO DO AMOR”, e onde a “Química do AMOR” quede enchida dos efluvios desprendidos dos experimentos que cada un de nós é quen de formular cos “ingredientes esenciais”. Creando as mellores “FÓRMULAS DE BO AMOR”.

Formular é receitar, prescribir, manifestar, expor con claridade e precisión. Unha fórmula é un medio práctico para resolver un asunto complicado, é una receita na que se indican os elementos que se deben empregar na curación de algo ou alguén, é una expresión matemática que resume os cálculos necesarios para a resolución dun problema e que serve como regra de uso para eses casos, é a representación simbólica, mediante letras e números, da composición dunha substancia química. É, ante todo, pensar a mellor das vidas para cadaquén, e para todxs, porque tamén podemos pensar o que hai, no amor, de colectivo…

Unha vez aclarado o que debemos facer, poñámonos a inventar e formular as mellores receitas para acadar o BO AMOR, non esquezamos que a experiencia vale un grao (como adoita dicirse), e teñamos en conta o que sabemos que funciona e o que non, por iso é moi importante elixir ben os elementos que provocan reaccións positivas e deixar fóra os que orixinan reaccións negativas, explosiónsssssssss destrutivas!!!!

Lembrade os conceptos que relacionamos co BO TRATO e que están expresados no seu mural: respecto, igualdade, dignidade, liberdade, amizade, equilibrio, benquerencia, amabilidade, compañeirismo, agarimo, compromiso, empatía, lealdade, coidado, asertividade, solidariedade, feminismo, comprensión, bo amor…, e deixemos fóra os negativos, que todxs sabemos cales son…, non si?

Paralelamente, ofreceremos neste blog, certos recursos relacionados, que poden servir para acadar unha boa educación sentimental: textos, videos, cancións, poemas… Ademais de poder adicar tamén cancións ou música na RADIO ESCOLAR, seguindo a liña do Bo Amor.

-------------------- * --------------------

BASES DO CONCURSO “FÓRMULAS DE BO AMOR”

Podedes participar no CONCURSO “FÓRMULAS: A QUÍMICA DO BO AMOR”, ao longo deste trimestre de primavera que asoma, para pensar nas mellores receitas ou fórmulas para acadar fantásticas, magníficas, marabillosas, en definitiva, boas relacións sentimentais.

Para iso non tedes máis que formulalas así, por exemplo:

A = I + R

-Especificando que: A é amor, I é igualdade, R é respecto; usando as variantes e elementos que consideredes esenciais na fórmula que queredes proponer e compartir.

-E usando calquera letra, número, símbolo, signo.

-Dándolle un ton poético ou científico, fantástico ou realista …

-En calquera lingua que dominedes.

-Serán escritas sobre corazóns de cores seguindo este modelo:

(recortades un corazón no material e cor que queirades (como moi grande folio A4, ou menos)onde escribiredes a vosa fómula, ese corazón terá outra parte en forma de ronsel ou etiqueta a un lado, onde explicades a clave para entender dita fórmula)

-Que presentaredes sen nome, cun pseudónimo escrito por detrás, cos datos en sobre pechado e por fóra só ese pseudónimo ou sobrenome. Entregaranse nos recreos na Biblioteca, ata o 12 de marzo.

-Unha vez formuladas colocarémolas no “LABORATORIO DO AMOR”, para ser “estudadas e experimentadas e ver a súa efectividade”.

-Será premiada a fórmula mellor valorada polo xurado, que estará composto por expertxs na “Ciencia do Bo Amor”.

-O PREMIO consistirá nunha CEA ROMÁNTICA PARA DOUS…

ANIMÁDEVOS E NAMORÁDEVOS BEN!!!!

20/1/15

BO TRATO: CONTRA TODO TIPO DE VIOLENCIA // EN DEFENSA DA CONVIVENCIA PACÍFICA ENTRE IGUAIS

No trimestre anterior comezamos a andaina para promocionar o BO TRATO, primeiro contra a violencia machista, agora en defensa dunha convivencia pacífica que respecte a diversidade e a igualdade, e seguiremos esta liña vermella en febreiro para reflexionar sobre o sentimento e a experiencia do BO AMOR.

-EN DECEMBRO, no corredor creamos un espazo de BO TRATO, onde desgranar os conceptos esenciais relacionados sobre os que traballar: igualdade, respecto, dignidade,
liberdade, compromiso, benquerencia, amizade, compañeirismo, cooperación, feminismos, asertividade, empatía, equilibrio, comprensión...

e a un lado deixamos o espazo que iremos armando coas fotografías feitas de cada grupo de alumnos e alumnas, por curso, ademais de unir a elas as do Club de Lectura e a das persoas adultas que traballamos neste Centro de Ensino: conserxe, administrativo, profes, encargada da cafetaría..., para poñer en evidencia o noso rexeitamento ante o maltrato, pero dende unha postura positiva como é a promoción do bo trato. Así cada grupo reflexionou sobre este asunto e chegou a unha idea, un eslogan ou unha imaxe nas que basear a súa posta en escena comprometéndose todas e cada unha das persoas que aquí convivimos. Será agora en Xaneiro cando deamos colocado cada unha das fotografías ampliadas para completar o noso muro do BO TRATO. Por suposto que tamén creamos, a carón, un punto atractivo e cómodo para poder ollar os diferentes libros e filmes que recomendamos relacionados con esta temática.

-EN XANEIRO, e dado que estamos sendo asaltados por feitos violentos cada dous por tres, non queremos deixar pasar a ocasión de sensibilizarnos, implicarnos e facer unha reflexión a través dun CONCURSO DE VIÑETAS: UNHA OLLADA Á PAZ.

CONCURSO DE VIÑETAS

PARA UN XANEIRO DE PAZ

A biblioteca calixtina convoca:

Viñetas: unha ollada á paz

relacionadas:

coa defensa da paz, do respecto, da liberdade de expresión, da convivencia na diversidade, da capacidade de ser críticos e de ter as mentes abertas, de defensa e valoración do humor gráfico…

bases:

quen así o desexe pode presentar unha viñeta de creación propia, orixinal, con liberdade de estilo, nun formato sobre papel (ou calquera outro material) de tamaño a4, Baixo pseudónimo escrito por detrás do traballo e os datos persoais (nome completo e curso) en sobre pechado só co pseudónimo (nome falso) por fóra.

prazo:

entregaránse(traballo e sobre) nos recreos na biblioteca ao longo deste mes de xaneiro e ata o día 29, para poder ser expostos

o día 30 de xaneiro, día internacional da paz

1º premio: -agasallo dun libro ilustrado ou de bd.

Animádevos a participar!!!!

-EN FEBREIRO, seguiremos esta liña de actuación para educar no BO AMOR, e facer unha necesaria análise do sentimento amoroso e os seus usos e abusos, malentendidos, sufrimentos, dependencias, etc.; coa finalidade de aprender a vivir os nosos sentimentos e paixóns dun xeito -a poder ser- equilibrado. Faremos un mural da "FÍSICA E QUÍMICA DO AMOR" e convocaremos para a ocasión un CONCURSO DE FÓRMULAS DE BO AMOR, para exercitar a expresión escrita.

24/6/14

CONCESIÓN DOS PREMIOS DE POESÍA: "O BOSQUE DAS LINGUAS DO AMOR"

Formado por 4 alumnas/os de 2º e de 4º ESO e por 2 profesoras en representación dos departamentos de linguas e da bibliotecaria, reuníuse o xurado para valorar e decidir cal dos escritos presentados ao concurso "O BOSQUE DAS LINGUAS DO AMOR" resultaba por fin destacado. Non foi fácil a selección dado que, cada unha das poesías ou dos textos de prosa poética realizados polo alumnado, tiñan o seu valor tanto no fondo como na forma. O noso obxectivo de promocionar a escrita, ademais da lectura, quedou ben cumprido.

A gañadora foi Mar Rodríguez Troncoso, alumna de 4º B e autora dun soneto apaixonado que sorprendeu ao xurado pola súa coidada forma, quen acadou o 1º PREMIO, e polo tanto, unha CEA ROMÁNTICA para dúas persoas.

Pero tamén decidimos outorgar dúas mencións especiais aos escritos de:

- Christopher Nogueiras Busto, alumno de 4º C, polo seu fermoso poema en lingua italiana (que aprendeu do seu pai, quen traballou en Venecia un tempo), e que elixiu como agasallo o libro "El Quijote", que quere ler en verán.

- E ao poema da alumna de 1º B, Nazaret González Coto, que nos sorprendeu pola súa calidade e profundidade. Para ela eliximos un libro ilustrado "Emocionario", pois durante o curso leu entusiasmada os libros ilustrados que temos na biblioteca, e pensamos que sería un acerto.

Os escritos presentados están colgados no novo Espazo de Creación, na sección "Poetas de agora". Buscade na columna dereita deste blog. Xa vos falaremos deste Espazo en setembro...

23/3/14

O BOSQUE DAS LINGUAS DO AMOR: "Actividade Río"

-No mes de Febreiro, como primeira fase, e con ocasión da celebración do día dos NAMORADOS, despregamos un gran friso no corredor que foi convertíndose nun extenso bosque cambiante segundo o paso das catro estacións: outono, inverno, primavera e verán. Dende o principio contamos coa colaboración de varios membros do Club de Lectura e alumnos e alumnas atraídos polo debuxo e a pintura que se brindaron a ir dándolle forma a ábores e follas ao longo dos recreos, de certas horas de Atención Educativa e, especialmente, do permiso de Nacho, o profe de Plástica, que deixou saír das súas clases a estas persoas colaboradoras e valorou a súa actividade.

outono

A idea era ter un soporte para despois pegar nas ramas das árbores as follas cos escritos en verso ou prosa poética presentados a concurso polo alumnado interesado e sensibilizado coa creación literaria na lingua escollida: galego, castelá, árabe, italiano...

Por certo, aínda podedes participar..., o caso é animarse a escribir.

inverno

Inspiradas polo contexto, varias alumnas tiveron tamén a iniciativa de propoñer unha exposición de debuxos de tema amoroso, que acompañarían a presenza do noso TROTAMUNDOS Cali na parte superior, lendo nunha nube de ensoñacións:

O CEO DOS NAMORADOS

Gústache debuxar? Agora podes facelo:

Adica un debuxo a "esa" persoa especial coa temática do AMOR, claro está.

Todos os debuxos entregados na Biblioteca serán expostos xunto a CALI, a nosa pantasma favorita, nun mural por San Valentín.

Atrévete a debuxar!

"Esa" persoa especial o verá!.

O bosque das linguas do AMOR

-Chegado Marzo, e como o proceso deu o seu traballo, nunha segunda fase, e despois de respectar a exposición dos escritos de propia inventiva un tempo oportuno, pasamos a poboar as copas das árbores de máis e máis follas de todas as cores contendo os versos de amor de poetas do noso gusto que fomos seleccionando aquí e acolá, e tamén en diferentes linguas, xa que de fondo estaba a intención de "viaxar a través delas pola poesía de diferentes culturas". Este material está a mercede de seren utilizado por todos para traballar o recitado e a lectura, e serve para poñer en coñecemento dos mozos e mozas os nomes e palabras de escritores fabulosos: Neruda, M. Hernández, Machado, Salinas, Aleixandre, Lorca, Rosalía de Castro, Lupe Gómez, Ángel González, Félix Grande, L. M. Panero, Rimbaud, Pessoa, Xela Arias, Ana Romaní..., e moitos nomes maís de agora e de sempre. É a nosa contribución ao Día da Poesía (21 Marzo) e á Primavera.

primavera

-Será en Abril que, nunha terceira fase -este friso animado polas intervencións que durante todo este tempo fixemos todos os que por alí pasamos e quixemos debuxar ou pintar deixando o noso rastro creativo e a nosa interactividade espontánea- servirá como decorado de fondo da representación de Contacontos que pensamos facer para os pequerrechos do lugar, no CRA, a finais deste trimestre.

verán

Por todo isto, a denominación de "Actividade Río" parécenos do maís axeitada. É un bo exemplo das destrezas que aprendimos a desenvolver para rendabilizar o tempo e o esforzo empregado por todas/os. Xa só nos queda dar as grazas pola colaboración recibida, que fixo maís lúdica esta actividade.

7/2/14

BASES CONCURSO DE ESCRITA - NAMORADOS-FEBREIRO 2014

-BIBLIOTECA E DEPARTAMENTOS DE LINGUAS-

Para promocionar as inquedanzas e ansias de exercitar a experiencia da escrita ao redor da temática amorosa, co gallo do día dos Namorados, convocamos o CONCURSO:

MENSAXES CURTAS DE AMOR:

“AS LINGUAS DO AMOR”

Toda aquela persoa que queira participar deberá axustarse ás seguintes BASES:

- Elaborar escritos orixinais (de invención propia) en prosa poética ou en verso, na lingua que se quixer: galego, castelá, francés, inglés, portugués, árabe ...

- A extensión dos textos será non inferior a 4 versos ou a 2 liñas se é prosa, e non superior a 14 versos ou 12 liñas se é prosa.

- O contido xirará ao redor da temática do AMOR.

- Presentarase cada texto nunha cartolina ou folla de papel (de tamaño 15 cms. como moito) recortada en forma de folla de árbore e pintada coas cores naturais das follas vexetais, a elixir entre a gama dos verdes, amarelos, alaranxados, avermellados; para despois colocala nas copas das árbores do friso das 4 estacións, pintado no corredor da planta baixa. Todos os textos en forma de folla serán expostos para conformar

“O BOSQUE DAS LINGUAS DO AMOR”

- Os textos serán presentados en sobre pechado contendo os datos do autor/a e o título da súa obra, facendo constar por fóra do sobre un pseudónimo (nome falso) que cada quen recoñecerá.

- O prazo remata o venres día 14 de febreiro á hora do recreo. Serán entregados en Biblioteca, á hora do recreo, ou en Conserxería.

-Haberá un único premio: unha “CEA ÍNTIMA” para dúas persoas.

ANIMÁDEVOS!!

14/2/13

Día dos namorados moi musical

Hoxe 14 de febreiro, día dos namorados, tod@s os que tivéchedes a ben adicar unha canción do noso listado e deixar a vosa petición no pentagrama do corredor, poderedes escoitalas no programa da radio escolar durante o recreo.

A vosa participación foi impresionante! Se é que o dos corazonciños vos volve tol@s... Agora resta que vos animedes tamén a participar no concurso "Cantaruxando por amor", tedes ata final de mes para entregar os vosos retrousos.

22/1/13

Cantaruxando por amor

Neste curso comezamos a preparar as actividades para o día dos namorados ben cedo, xa que o entroido está á volta da esquina e xa sabemos o que iso significa, sobre todo aquí en Salceda.

Os MQs adornaron o centro con pentagramas amorosos e vos propoñen dúas opcións para participar/celebrar con música e sentimento esa data especial do mes de febreiro: por unha banda, podedes facer dedicatorias de cancións que escoitaremos pola radio escolar no recreo do día 14 e por outra, podedes animarvos a participar no concurso "Cantaruxando por amor".

As bases para participar no concurso son as seguintes:

1- Debes poñerlle letra ao retrouso dunha melodía escolmada por ti. A letra debe ser orixinal pero non a música, que podes tomala prestada de calquera canción coñecida.

2- Escribe o teu retrouso nun corazón (pídello a Begoña) e cólgalo no pentagrama que tes na entrada engadindo o teu pseudónimo.

3- Entrega na biblioteca un sobre que teña por fóra o teu pseudónimo e por dentro o teu nome, apelidos e curso. Anota tamén a canción da que tomaches prestada a melodía.

4- O prazo de entrega remata o 28 de febreiro.

5- Os MQs e o equipo de biblioteca elixiran aos finalistas e os convocarán a unha sesión en directo onde se elixirá o gañador/a do concurso.

6- O premio será un vale para unha cea romántica para dúas personas.

12/3/12

nAMORarte

Este curso escolar o proxecto da nosa Biblioteca Escolar está vencellado á Arte. Por iso aproveitamos o mes de febreiro e a data dos namorados, nada máis nin nada menos, que para convidarte/convidarvos a nAMORarte (ou namorarvos) a través da nosa modesta exposición de imaxes de cadros, esculturas e fotografías relacionadas co amor. Procuramos que a mostra, aínda que pouco numerosa, fose representativa de diferentes estilos e étapas. Agora, xa ben entrado o mes de marzo e a piques de comezar a primavera, atopaches xa a túa imaxe favorita?

24/2/12

E a gañadora do "Amor na rede" é...

Onte no recreo houbo reunión de MQs para escoller o corazón gañador do noso concurso "Amor na rede". Despois de escolmar aqueles que cumprían as bases, fixemos unha selección de catro finalistas. Logo dunha difícil e rifada votación, o gañador foi o corazón que tedes abaixo na imaxe, que viña asinado como "Piolín" e resultou pertenecer a Cristina Vaqueiro Gómez de 3ºC.

Noraboa, Cristina!!! E xa sabes, vai pensando en a quen vas levar de cea...

Os outros tres finalistas pertencen a Jessica Bonet Iglesias (4ºA), Celina Fernández Vázquez (3º D) e Karen Engster (3ºA).

Ficamos moi satisfeitas pola numerosa participación. Grazas!

7/2/12

Concurso: O amor na rede

Bases Do Concurso Amor na rede

3/3/11

O concurso "Un flash de amor" xa ten gañador

Pois si, o noso romántico gañador deste ano non é outro que Pablo Leal coa foto que vos mostramos a continuación:

Cuando menos lo esperas... sale el sol

Non creo que teñamos dúbida de quen o vai acompañar na CEA ROMÁNTICA...

Se queredes ver as outras fotos participantes premede aquí.

15/2/11

Decoración interactiva por San Valentín

Cando comezamos cos preparativos para a celebración do Día dos Namorados, os nosos MQs, coma sempre, puxeron a traballar o maxín para idear o concurso deste ano, o lema, o xeito de publicitalo e, como non, a decoración.

Decidiron facer un camiño de corazóns que nos levase ata a entrada da nosa biblioteca. Alí nos estarían esperando os libros e películas recomendadas para estas datas e as bases do concurso.

O que ninguén podía esperar era que espontaneamente todo o mundo quixera deixar a súa mensaxe escrita nos corazóns. Ás poucas horas non quedaba ningún libre. Todo un éxito, MQs!

13/2/11

No Día dos Namorados, un amor de película... ou de novela!

No día dos Namorados non podiamos deixar de recomendarvos algúns libros e películas de temática amorosa.

Se premedes enriba das imaxes podedes acceder ás reseñan (no caso dos libros) ou aos trailers.

Que as disfrutedes!

7/2/11

Concurso polo día dos namorados: O amor nun flash

"Eros y Psique". Antonio Cánovas.

Coma todos os anos, e xa que se vai acercando a data, a biblioteca vos convoca a participar non novo concurso polo Día dos Namorados.

Nesta edición o lema é "O amor nun flash"... adiviñades por onde van os tiros... Pois si, para participar hai que entregar unha fotografía que represente o que é para vós o amor cun pé de foto explicativo. O prazo de entrega remata o 21 de Febreiro e as fotos podedes, ou ben entregalas directamente na biblioteca ou mandárnolas por mail ao noso enderezo: biblosvivos@gmail.com. Admítese tanto o formato dixital como en papel.

O premio, a risco de parecer repetitivas, segue a ser unha CEA ROMÁNTICA.
Para que vos vaiades poñendo en situación...

Contamos coa vosa participación!!

1/2/10

Concurso: un mar de amor.

Para festexar o Día dos Namorados decidimos novamente convocar un concurso e repetir premio, UNHA CEA ROMÁNTICA, xa que parece que ten bastante éxito (preguntádelle a Ari). Para participar NUN MAR DE AMOR debedes escribir unha MENSAXE DE AMOR e metela NUNHA BOTELLA que deixaredes no mar creado para o efecto diante da biblioteca.

- A mensaxe debe ser de creación propia. Non valen textos copiados, letras de cancións, poemas de autores/as, ...

- Pode ser unha frase, un conto, unha carta, uns versos, ...

- Poden ir dirixidos a un destinatario concreto ou anónimo.

- Valorarase tanto o texto como a botella. Decorádea como queirades.

- Poden participar alumnos/as, profesores/as e calquera persoa que reciba a invitación ao evento a través do seu Tuenti, estes últimos poderán enviala por correo ao seguinte enderezo:

IES Pedrasrubias

Pantel revolta s/n

36472 Salceda de Caselas

- Debedes firmar a mensaxe cun pseudónimo e logo entregarnos a Susana ou a min (Ana) un sobre donde figure ese pseudónimo por fóra e os vosos datos reais dentro.

Así que xa sabedes, animádevos e participade!

1/4/09

Mii cuentoO peRfectoO gaña o "101 palabras de amor"

¿Cómo explicar todo lo que nuestros corazones sienten en unas simples palabras? Cada mirada, cada caricia, cada beso, cada abrazo...SENTIMIENTOS...los mismos sentimientos por los que me levanto cada mañana deseando volver a verte, a sentirte junto a mi, para SIEMPRE... Tú me enseñaste a querer como nunca había querido y por eso ahora tengo miedo a que esto se acabe y a que después no pueda seguir adelante sin ti, ya que mi corazón late porque estás tú. No importa lo que piesen los demás..lo único que importa es que TE QUIERO...(L)

Como vos quedades despois disto? Mii cuentoO peRfectoO, ou sexa, Ariadna (3ºB) recibiu o xoves 2 de abril o seu premio como GAÑADORA do concurso "101 palabras de amor".

Fixeron entrega do "Vale por unha cea romántica" os maqueadores de 3ºB, Jesús e Ana.

Agora só nos queda ver con quen vai de cea... Ollo, Ari, estaremos vixiando.... e que aproveite!!

Moitas grazas a todos e todas por participar. Esperamos que sigades así.

3/2/09

Concurso “101 palabras de amor”

O día 14 de febreiro (como xa tod@s saberedes) é o día de S.Valentín, día no que se celebran os sentimentos do amor e o cariño.

Pero…de onde vén esta tradición? Para os que non o saibades, e ao contrario do que pensan algúns, S.Valentín non é unha festa puramente comercial.

Esta tradición remóntase moi atrás na antiga Grecia.
Daquela existía unha lei que prohibía aos fillos e fillas casar sen o consentimento do pai, que normalmente os casaba sen pedirlle opinión á rapaza ou ou ao rapaz. Existía entón un cura que casaba clandestinamente ás parellas sen consentimento do pai, que non podía desfacer o matrimonio dado que o divorcio estaba prohibido. Este cura, chamado (como non) Valentín, vivía agochado e foi severamente castigado coa morte en canto o atoparon. Máis tarde foi nomeado santo. En canto ao 14 de febreiro, dise que foi o día do seu pasamento.

Por iso o noso instituto decidiu facer unha actividade para conmemorar este día tan especial.
Dende ¡XA! e ata o día 20 de febreiro poderedes participar no concurso para gañar… UNHA CEA ROMÁNTICA!!
Deberedes entrar no COMENTARIO desta entrada e escribir un texto sobre o amor que debe ter unha extensión de 101 palabras como máximo (non ten mínimo pero … non sexades vagos/as!!). Ao rematar de escribila, asinaredes cun pseudónimo (un nome orixinal que non sexa o voso, por exempo, Romeo). Despois tedes que entregarlle a Susana, a profe de galego, un sobre cos vosos datos (nome e curso) e por fóra o pseudónimo co que participades no concurso.
Xa sabedes, sacade o voso enxeño literario e participade… ou é que tendes medo??
Pasade un feliz San Valentín e non esquezades pór algo vermello ese día!!.

Os maqueadores/as do blog.

Por se necesitades estímulos (que non é o caso), aqui vos deixo un video sobre bicos na historia do cine, sacado dun fragmento dunha película que vos recomendo encarecidamente: "Cinema Paradiso".

Ah! un consello: parade o son do video da entrada anterior para escoitar a banda sonora, paga a pena.

Ana