LIBROS ADICADOS NO FONDO DA BIBLIOTECA CALIXTINA. A MODO DE DESPEDIDA

Ao longo destes anos tivemos a ben ir xuntando unha serie de libros adicados polos seus autores e autoras, que aumentan o seu valor por ter un engadido afectivo que xurdiu de ter compartido con estes escritores e escritoras o gusto por ter uns obxectos singulares que chamamos libros e poder lelos. 

Por iso tamén decidimos instalalos xuntos, en principio na vitrina da entrada, para darlle o valor que merecen e facelos visibles de cara aos usuarios da Biblioteca, para que as novas lectoras e lectores saiban aprecialos. 

"Quero dicir para despedirme, que despois de ter traballado nesta Biblioteca durante un bo feixe de anos como coordinadora, nun proceso de aprendizaxe en común moi gratificante en tantos aspectos, vendo crecer a varias xeracións física e intelectualmente, compartindo con vosoutras novidades e tamén grandes clásicos da literatura, do cinema, da música e máis; non quero despedirme sen tervos agradecido esta experiencia e deixándovos nestes andeis algo do meu gusto pola lectura, pero tamén pola escrita e pola arte. 
Por aquí ou por acolá, neste tempo tan acelerado que vivimos, andaremos na busca da calma nas diferentes voltas do camiño..."   Apertas. Paula

ENTREGA DE PREMIOS NA BE. MÚSICA E FESTA DE DESPEDIDA

O último luns 20 de xuño eliximos facer unha FESTA de DESPEDIDA coa desculpa de facer tamén a entrega de PREMIOS DOS CONCURSOS que convocamos durante este curso 2015-2016 dende a Biblioteca e coa colaboración dos Departamentos que tiveron a ben participar.

Como é menester en toda festa que se precie, había uns pinchos, faltaría máis!, tiñamos músicos para acompañar cuns redobres a entrega de cada premio a cada concursante destacado ou destacada, e a presenza de todas estas persoas e máis:

Concurso de Carteis en contra da VIOLENCIA MACHISTA:
-Inés e Nerea de 4º ESO
-Aroa e Katia de 3º ESO
-Sara e Yudith de 2º ESO

Concurso de BD en defensa da PAZ:
-Iago Ferreira de 3º ESO
-Alba Cabaleiro de 4º ESO
-Laura Besada de 2º ESO

Concurso de CALI-GRAMAS en relación á idea do BO AMOR:
-Tania de 4º ESO
-Sana Goufri de 3º ESO
-Uxía Barros de 2º ESO
-Diana Cerqueira de 1º ESO

Seguidamente, quixemos facer unha homenaxe a PRINCE, cunha versión instrumental de Purple Rain a cargo dos nosos músicos. Esta sesión seviu de ensaio para o Gran Concerto que estaban a preparar para o día seguinte coa profesora de Música, Mercedes, quen tamén colaborou nas tarefas de Biblioteca xunto co profe Raúl e con Paula este curso.

E acabamos, como en toda festa, charlando, facendo fotos para o recordo e tomando o que quedaba ao son da música...

RECITAMOS POEMAS DE MANUEL MARÍA

Presentación Manuel María. Recital BE. Maio 2016

View more presentations or Upload your own.

Comezamos o fermoso mes de Xuño, no recreo do seu primeiro día, co RECITAL DE POEMAS DE MANUEL MARÍA, da man dos Siareiros da Palabra, do noso Club de Lectura, que sempre se animan ante a poesía, que tan bos resultados dá para ler ante o público, vencer timideces e temores, aprender a recitar sen presas, proxectando a voz, meténdose no sentido dos versos e modulando a voz co que queren dicir...

Quedamos satisfeitas do resultado todas as persoas que participamos, porque procuramos elixir os textos do autor que máis atractivos nos pareceron e que máis podían gustar á mocidade; e porque foi moi variado, con lecturas serias, introspectivas, alegres, divertidas ou comprometidas... Tivemos ademais o ingrediente de comezar con "O carro", versos de Manuel María musicados por Suso Vahamonde, moi populares; interpretada esta canción pola entrañable voz de Isabel Vázquez de 4ºC e as guitarras de Dani Peroja e Brais Barcala de 4ºA. Para o final reservamos a festiva "O cuco" tamén musicada por Suso Vahamonde, que a modo de karaoke cantamos todos a unha. 

TAMÉN LEN DE MAIO con HELIER BURGOS E MARCOS TRONCOSO

Helier e Marcos hai uns anos foron antigos alumnos e agora xa son profesores en prácticas, o primeiro de Educación Física e o segundo de Bioloxía. Polo que se ve, decidiron seguir este camiño que non é tan fácil como parece dende fóra, e aquí están entusiamados co seu futuro. Temos que agradecerlles que quixeran compartir na nosa Biblioteca e coa mocidade actual que aquí acudiu no recreo interesada e disposta a pasar un bo rato, uns relatos que elixiron do libro "Made in Galiza" de Sechu Sende: O ladrón de palabras, Falar, Unha palabra común, O paracaídas, Nin en soños vou perder a miña lingua, Estou contigo, que leron alternativamente con moita arte, deixando clara a súa postura en defensa da lingua galega que debemos coidar, como expresaron na introdución que fixeron para explicar as lecturas que seleccionaron e que tanto nos gustaron.

Xa eran coñecidos no noso Centro, porque tiveron a experiencia de participar este ano na excursión de Andorra, en calidade de acompañantes do alumnado de 2º ESO, sendo moi queridos.

PERSOAS-ANUNCIO. ACTIVIDADES DE FIN DE MAIO: TAMÉN LEN E RECITAL DE MANUEL MARÍA.

Como vedes, saímos ao recreo o venres pasado para anunciar as actividades que temos programadas para esta semana, grazas ás PERSOAS-ANUNCIO que achegaron a información dun xeito divertido e eficaz.

Así pois, todas as persoas interesadas estades invitadas a vir á Biblioteca no recreo: 

-o martes 31 para participar no Tamén Len con dous antigos alumnos invitados, 

-e o mércores 1 de xuño para disfrutar, nas voces dos Siareiros da Palabra, do Recital de poesía de Manuel María, escritor a quen se lle adica este ano o "Día das Letras Galegas", ademais de preparar varios cantos moi populares baseados nos seus poemas.

CONTAMOS CONTIGO!!

RECITANDO VARIAS PASAXES DE "EL QUIJOTE"

Como vos contamos anteriormente, deixamos aquí os vídeos do recitado de memoria e dramatizado, que fixeron con total arte os profesores de Lengua Española, Sonia e José Luis; este último, asiduo invitado noso e colaborador en varias actividades programadas dende a nosa Biblioteca Calixtina, a ámbolos dous queremos agradecerlles de verdade a súa participación neste recreo especial do martes pasado, cando fixemos o Maratón de Lectura. Foi un pracer escoitalos.

Sonia elixiu contarnos a magnífica descrición que o Quijote fai da súa amada Dulcinea. José Luis decidiuse polo famoso episodio da aventura cos muíños de vento que libraron Don Quijote e Sancho Panza...

                                   

VARIAS ACTIVIDADES AO REDOR DE "DON QUIJOTE"

Esta semana foi a que adicamos no IES Pedras Rubias a realizar unha serie de actividades ao redor de "Don Quijote".

Comezamos o luns ben forte: 

-Conversamos sobre este personaxe e o mundo que o rodea, entre os Siareiros da Palabra na sesión do Club de Lectura a mediodía, lendo o principio da obra de Cervantes, para despois comparala coa Banda Deseñada titulada "Don Quijote" debuxada por Flix, autor alemán de cómics que decidiu adaptar libremente o gran clásico e transportalo á chaira alemana na época actual, encarnados, Quijote e Sancho, nun "abuelete" con demencia senil ou alzheimer que protesta e se manifesta polo que considera inxusto a través de cartas que manda á prensa local, "desfacendo entuertos" xunto ao seu neto que, vestido de Batman, fantasea influído polos superheroes do cómic, nunha relación de tenrura e de denuncia da soidade e de problemáticas actuais. Tamén aproveitamos para escoitar de fondo á Banda de música Cultural de Salceda de Caselas interpretando "O Quixote", fantasía sinfónica para narrador e banda de Ferrer Ferrán

-Preparamos o bosquexo das figuras de "Quijote e Sancho" sobre un cartón a tamaño natural, para despois baleirar un óvalo nas súas faces e poder así meternos na súa pel recitando variadas pasaxes do texto de Cervantes, ademais, claro está, de querer todxs facernos a típica foto coa nosa cara metida nas súas figuras. Grazas unha vez máis ao profe Nacho, que é un artista e aos seus colaboradores.

-Seguimos o martes 3 de maio, co Maratón de Lectura adicado á lectura do "Ingenioso Hidalgo Don Quijote de la Mancha", que se realizou ao longo de toda a mañá, participando alumas/os, profes, conserxe, administrativo, etc, coma sempre, ademais de contar coa presenza de José Luis, o noso asiduo invitado, mestre xubilado, que se brindou a facer un recitado de memoria dramatizado da aventura de Don Quijote cos muíños de vento, e a profe Sonia que tamén recitou a pasaxe da descrición de Dulcinea, dun xeito moi, moi  expresivo. Estamos agradecidas da súa amable participación que resultou sumamente atractiva para o público reunido no recreo na Biblioteca. Os seus vídeos estarán colgados no seguinte post, recomendamos velos e disfrutar deles.

-E aínda nos queda disfrutar das figuras debuxadas en cartón de "Quijote e Sancho", que utilizaremos no corredor e nas aulas, e que, como vemos nas fotos, estiveron como decorado de fondo no Maratón na BE.

A EX-ALUMNA LORENA PÉREZ NO TAMÉN LEN

O pasado martes 26 estivo connosco a antiga alumna Lorena Pérez para ler uns capítulos de "Ollos de auga" de Domingo Villar, lectura que elixiu ela mesma por considerar que é un libro entretido para recomendar, ademais de traerlle gratas lembranzas daquela visita do autor hai anos. 

A través do coloquio posterior puidemos comentar aspectos ben interesantes da vida desta moza, que dende pequena, cando ía en 3º de Primaria, enganchouse ao BALONMÁN para sempre. Comezou a xogar na escola e dalí acabou formando parte do Club Balonmano Porriño, co que entrena todos os días un par de horas (entre as 22h e as 24 h da noite), pero iso non lle impediu estudar Comercio Internacional e Marketing, tendo agora unha beca. Tenta ter tempo para todo o que quere facer.

Di que o balonmán non dá para vivir, alomenos en Porriño; é máis doado para os homes que para as mulleres poder vivir del. É duro adicarse a este deporte, pero é moi gratificante xogar, competir, aprender a convivir, o compañeirismo, coñecer a moita xente boa de todas partes, etc. 

http://balonmanoporrino.com/index.php/noticias?layout=blog

https://www.facebook.com/BalonmanoPorrino

Non esquezamos que é xogadora de División de Honor de Balonmano Porriño, leva catro anos xogando en 1ª división e ascenderon á máxima categoría. Contounos a experiencia de participar no "Torneo de la Copa de La Reina", que se xogou en Porriño en abril. Non adoitaban pasar de cuartos e este ano chegaron a semifinais. Aínda que non hai moitos seguidores en Porriño, esa fin de semana si que houbo moito público e repercusión nos medios informativos.

Para nós foi moi gratificante coñecer as súas experiencias e inquedanzas e agradecemos a súa presenza e a súa colaboración para promocionar a lectura entre a mocidade.

DÍA DO LIBRO - 23 Abril.

Hoxe, aínda que en sábado, facemos a nosa particular homenaxe no Dia do Libro, mostrando citas e estes documentos que invitan a ler a quen así o desexe. 

Pero non se trata de calquera documento, senón que a  Biblioteca Nacional de España pon a disposición dos lectores esta versión dixitalizada da primeira edición orixinal conservada nos seus fondos do "Ingenioso Hidalgo Don Quijote de La Mancha", para lelo pincha no seguinte enlace:

 http://quijote.bne.es/libro.html

       Boa lectura dende o castelá do século XVII !!

Para saber máis:

https://es.wikipedia.org/wiki/Miguel_de_Cervantes

https://es.wikipedia.org/wiki/Don_Quijote_de_la_Mancha

http://www.biografiasyvidas.com/monografia/cervantes/

http://www.muyhistoria.es/curiosidades/preguntas-respuestas/ishakespeare-y-cervantes-murieron-el-mismo-dia

EXPERIENCIA DE LECTURA.

  -Liches este libro?, díxome Paula na Biblioteca.

  -En galego; faime falta, non teño soltura, vaime levar tempo...

Luns, esa mesma tarde ás 19'00, xa na casa, tócame un pouco de descanso antes de comezar ás miñas horas de estudo (oposicións), pero collo un momento o libro e comezo...

As 3'00 da madrugada, remateino...

Sabede que non estudei onte, pero non me arrepinto sobre todo porque facía tempo que non sentía esta mestura de mágoa e ledicia. Comparto eses momentos desoladores, de tristeza, como nunca...

                         
                    Belén Gil Lago, profe de Física. Un día de Abril  de 2016

PAPEL DE MULLER: FICHA TIPO

>> ENVIAR OS TRABALLOS A: 

 bibliopedrasrubias@gmail.com

------------------------------------------------

Explicar que este que vedes sería o modelo a seguir para elaborar cada ficha cos datos da muller elixida por cadaquén. Ocuparía unha cariña ou dúas como moito, constaría o nome xeral da exposición no lateral dereito: PAPEL DE MULLER,  o título de cada ficha: NOME DE CADA MULLER E CRONOLOXÍA, o corpo ou texto co máis salientable da súa vida e obra, e ao final só queda nomear as fontes de información que consultáchedes e poñer os vosos nomes (lembrade que se pode traballar só ou por parellas). 
O importante é atopar a boa información e despois destacar o esencial desa muller, sabendo expresalo correctamente coas vosas propias palabras e corrixindo os erros ortográficos e de expresión en galego.

Como vedes, na parte última especifícase o tipo de letra e tamaño, cores a utilizar, sen esquecer citar as fontes consultadas e facer constar o nome/s do alumnado autor da ficha. Unha vez buscada a información que queirades destacar sobre cada personaxe, resumida no esencial, expresada en galego e revisada a ortografía, tedes que envialo ao correo arriba indicado: bibliopedrasrubias@gmail.com
O prazo de presentación é ata a semana do 11 ao 15 de Abril. Seremos varias profes,  quen nos ocupemos de maquetar ou revisar o resultado final.

Lembrade que xa están colgados neste blog algúns post con información de páxinas fiables que podedes consultar e que vos servirán como orientación para contrastar coas páxinas que atopedes pola vosa conta. 

Tamén tedes no corredor, na entrada da Biblioteca Calixtina, a EXPOSICIÓN DE LIBROS RELACIONADOS: "PAPEL DE MULLER", coas diversas actividades ou traballos feitos por mulleres ao longo da historia e en diversos campos, que forman parte do fondo da nosa biblioteca e que están a vosa disposición para consultar.

Agradecemos a colaboración de todxs vós!!

TAMÉN LEN CON TINO NÚÑEZ: TROMBONISTA.

O pasado xoves, de volta do Antroido, compartimos o recreo con Tino Núñez, antigo alumno e actual trombonista, quen foi presentado debidamente e recibido por un nutrido grupo de alumnxs músicos que interpretaron "New York New York", en alusión ao proxecto máis inmediato de Tino, que segundo nos comentou é irse a EEUU a estudar e tocar; pois despois de colaborar estes anos con formacións musicais como a Banda de Música de Salceda, a Orquesta Sinfónica de Galicia, de ter traballado en Navarra, Sevilla, Barcelona (interpretando música para ópera no Liceo), incluso en Alemaña, pensa que é un momento de cambio na súa vida e quere cruzar o "charco" para seguir coa música e ter novas experiencias. Expresou que a vida de músico é moi sacrificada, con anos de estudo é unha profesión dificil, que debería estar mellor recoñecida. El foi precoz porque con 18 anos marchou a tocar a Pamplona e dende aquela non parou. Pensa que Galicia ten unha gran riqueza musical e artística e que se pode vivir da música, que o importante é transmitir enerxía e xuntarse para tocar e aprender; comentario que seguramente animou a varios dos nosos alumnxs destros nestas artes. Gústanlle especialmente o trombón. o chelo e insistiu no gusto pola ópera. Como demostración interpretou para nós ao final a aria "Nessun dorma" da ópera Turandot de Giacomo Puccini.

Para este Tamén Len, elixiu un libro editado por Baia Edicións en 2011: "Obras breves de imaxinación" Premios de Relatos "Mulleres Progresistas". 2007-2011, do que destacou o relato "O sono do peneque" de Pilar Ortega Pereiro, cunha lectura a viva voz do máis expresiva.  Interesoulle compartir un texto comprometido co papel da muller na nosa sociedade, coa importancia que ten respectarnos uns aos outros...

Foi un verdadeiro pracer pasar este rato xuntos.

CALI-GRAMAS. BO AMOR

CALI- GRAMAS

Tendo unha Biblioteca co nome de CALIXTINA e por mascota a unha pantasma que se fai chamar CALI, non nos queda outra que adicarnos nalgún momento do curso a imaxinar e crear CALI_GRAMAS.

Un caligrama é unha composición poética, frase, palabra ou texto que adopta unha forma que alude ao seu contido, dispoñendo as palabras de tal xeito que formen unha imaxe (poesía visual).

Pensamos que sería ideal aplicar os cali-gramas a unha temática tan típica do mes de febreiro e que tanto atrae á mocidade: O BO AMOR.

Non temos máis que deixarnos inspirar por textos poéticos ou prosa alusiva ao tema amoroso, para que aparezan imaxes suxestivas e variadas, segundo a creatividade de cadaquén.

BASES DO CONCURSO:

-Presentarase un texto en forma de CALI-GRAMA, con liberdade de creación, de soporte e de extensión, relacionado co tema do BO AMOR.

-Empregarase a lingua que se desexe, o galego incluído, pero, en calquera caso, cadaquén revisará o seu texto para evitar faltas de ortografía.

-Entregaranse os traballos ao profesor/a que así o solicite para valorar na súa materia, ou/e na biblioteca nos recreos.

-O prazo terá como data tope o venres 19 de Febreiro, para poder montar con tempo a exposición no corredor.

-Entregaranse os traballos co nome completo e grupo por detrás, e por diante un pseudónimo e o número do nivel da ESO ao que pertence.

-Haberá algún premio para os cali-gramas mellor valorados.

-Animádevos a participar, pois contar coa vosa creatividade sempre enriquece e está na base das actividades que tentamos dinamizar.

-Van estes exemplos para orientarvos e que xurdan novas ideas:

(A Pantasma CALI. PFB)

                                             (non atopamos datos de autor)

HOMENAXE AOS MÁRTIRES DE SOBREDO.

Todos os anos temos un compromiso coa historia local, coa nosa memoria, cuns feitos que exemplifican o movemento agrarista de principios do século XX e, en concreto, os feitos do 28 de novembro de 1922 en Sobredo, onde varios campesiños e unha campesiña embarazada perderon a vida loitando pola Redención dos foros, en definitiva, por mellorar e deixar de pagar as cargas que tiñan cos donos das terras que traballaban e poder facerse con elas.

Organizámolo como un acto de convivencia entre o CEP Altamira, o IES San Paio de Tui, o IES Perez Tizón de Tui e o noso IES Pedras Rubias, onde ten cabida a comprensión e lembranza do feito histórico, o recitado de poesía e textos alusivos, a música en directo, un completo evento cívico, que adoitamos facer coincidir ao redor do 28 de novembro para todos os cursos de 4º ESO, tendo a  6º de Primaria como invitado especial. O domingo máis cercano é cando se fai o acto oficial de homenaxe por parte do Instituto de Estudos Agrarios Mártires de Sobredo (IEAMSO), no que están presentes tamén diversas autoridades locais comprometidas, e se adoita invitar a algún historiador especialista no tema. Este ano, en concreto, foi tamén invitado o profesor Xoán González Leirós, quen fixo un pormenorizado relato da nosa aportación ao longo de tantos cursos. Para mostra deixamos o enlace a dito video e ao texto escrito para este 93 aniversario, colgados no sitio:
-http://martiresdesobredo.blogspot.com.es/2015/11/o-video-dos-actos-do-93-aniversario.html
-http://martiresdesobredo.blogspot.com.es/p/93.html

E, como non, quede constancia tamén da participación do noso alumnado nunha actividade relacionada co noso pasado histórico, coidando a memoria e coidando a lectura de textos e o recitado de poesías de diversos autores galegos significativos:

TAMÉN LEN DE XANEIRO CO ACTOR SALCEDENSE DAVID AMOR

Comezamos 2016 de cine, como soe dicirse, porque tivemos a visita do actor de comedia DAVID AMOR, que é de aquí, mesmiño da Picoña, pero con vida en Pontevedra, e que, neste momento, traballa en Madrid na exitosa serie de TV "GYM Tony", aínda que foi quen de confesar que lle gusta vir a Galicia, onde ten a súa xente e onde cre que hai máis calidade de vida que no balbordo dunha gran capital.

Todo comezou no 2001 cando preparou un monólogo de "O Rei da Comedia" e se presentou ao casting.  A partir de aí, topouse con Fran Hermida e actuaron en Cafés e Salas, e na TVG en Supermartes. Durante un tempo atendeu a súa outra paixón: o balonmán, pasando por diversos equipos, ata xogar no "Teucro" e na actualidade no  equipo Sar de Redondela ". Pero esta actividade, para a que se preparou a fondo dende xoven, decidiu deixala en plano secundario para poder seguir o camiño da interpretación. Así traballou como humorista en Luar, Mareas vivas, foi guionista de "Land Rover", pasou por "O Club do chiste" en Antena 3 e despois en series como  a actual "Gym Tony" en Cuatro, ademáis de traballar con Resines en " Aquí paz y después gloria" en T5. Tamén probou no teatro, onde ten dúas propostas de comedia, aínda que lle gustaría traballar outros xéneros.

Contounos que a vida de actor non é como a pintan de lonxe, pois a súa xornada empeza erguéndose ás 5'30h da mañá, entra ás 7h para maquillaxe, etc e está rodando ata as 19h; deste xeito o que resta do día adícao ao deporte, a estudar os guións e deitarse cedo. Di que un actor non se fai millonario, pero el ten o que necesita e fai o que quere, gústalle a súa vida e neste sentido considérase  "millonario"...

"Recomenda ao alumnado ter o cerebro encendido ante a TV, os medios, hai que pensar e diferenciar ficción e realidade. A TV constrúe historias e crea emocións, pero non é a vida real." Destacou que con perseverancia se poden acadar os soños de cadaquén, el así o fixo e ten unha boa vida.

Para compartir a lectura elixiu un dos seus libros favoritos: "Polaroid" de Suso de Toro, que leu dun xeito magnífico, dramatizando o contido de varios relatos, meténdose no papel, atraendo o público e facéndonos pasar un momento moi agradable, ademais de servirnos de bo exemplo de como ler en alto...

TAMÉN LEN CON UXÍA OTERO

A ex-alumna Uxía Otero foi a nosa invitada o luns 30 de novembro, compartindo con ela a lectura "Somnámbulos" de Suso de Toro, a súa última novela publicada en 2014. Elixiu este libro para ler un relato onde escoitamos as voces que falan, o pasado, a memoria...

O certo é que non quedou moito tempo para dialogar, pero si nos gustou ter a Uxía entre nós, e sempre agradecemos dun xeito moi especial a presenza de alumnas e alumnos que pasaron polas nosas aulas. Neste caso, contounos que xa leva traballando varios anos na Cafetería Aragonta, onde está moi a gusto. É un pracer saber das súas experiencias e que veñan a compartilas connosco.

RECITAL: POESÍA ADOLESCENTE

Recital de Poesía Adolescente. Con textura de fume. 2015

View more presentations or Upload your own.

O día 4 celebramos o Recital de Poesía Adolescente, cos poemas publicados pola Fundación Rosalía de Castro, presentados por diferentes centros de Secundaria ao Certame de Poesía Escolar 2015. É de destacar a presenza de 3 alumnas e 1 alumno do IES Ribeira do Louro de O Porriño, que viñeron a recitar connosco: elas leron os seus propios versos e os Siareiros da  Palabra as poesías premiadas e publicadas que seleccionamos para a ocasión.

Tentamos facer un acto entrañable, onde se sentisen cómodxs, promocionar o gusto pola poesía, o uso do galego e da literatura galega, aprender a recitar, ademais de valorar os escritos de persoas tan xóvenes... Convocamos na Biblioteca porque é un espazo máis cálido, e decidimos dispoñer en círculo aos alumnos e alumnas que ían recitar, e no medio sentáronse os 4 invitadxs nun círculo menor. Deste xeito lían dende o seu sitio, bailando as voces ao redor, e evitabamos así o "pánico escénico dalgúns". 
Non é doado ler ou dicir versos en público e adoitan ir a presa e, ás veces, as voces soan baixas; pero por iso estamos a aprender, e podemos dicir que hai madeira de bos recitadorxs. Insistiremos nesta faceta que lles atrae tanto.

Houbo cheo total, disfrutamos o momento e abrimos unha porta a futuras colaboracións cos nosos invitados de O Porriño. Deixamos aquí algúns vídeos do recital e a actuación de Uxía González interpretando "Negra sombra" de Rosalía de Castro, xunto a Dani na guitarra, Clara no violín e Jessica na frauta traveseira.

                                             Negra sombra. Uxía González.

Sara Norniella. Caos.

         Metapoesía do desencanto. Leticia e Andrea.

PREPARANDO O RECITAL DE POESÍA ADOLESCENTE

Estamos a preparar un Recital de Poesía Adolescente, que faremos o mércores 4 de Novembro para celebrar o Día das Bibliotecas Escolares e para presentar tamén o Club de Lectura Siareiros da Palabra, que conta cunha morea de membros novos. 

A novidade é que será un acto especial, porque teremos como invitadxs a varixs alumnos/as do IES Ribeira do Louro que virán a recitar os seus propios poemas, varios deles premiados ou seleccionados no Concurso escolar de Poesía da Fundación Rosalía de Castro 2015.

Despois da ponte, xa vos contaremos como foi todo e o difundiremos para que tamén o disfrutedes e coñezades os versos. Polo de agora colgamos o fermoso cartel que creou Nacho Ruíz, profe de Plástica, para a ocasión. E para facer a publicidade necesaria, ocorréusenos que sería boa idea utilizar "persoas anuncio", que se pasearían nos recreos polo patio e corredores para chamar a atención, informar e que asista o público que así o desexe voluntariamente... 

Comprobamos xa que é un recurso moi efectivo...!!!!

TAMÉN LEN con ROCÍO PATO GARRIDO

Hoxe vimos de estar no recreo coa mestra do CEIP Altamira, Rocío Pato, quen nos brindou unha sesión de lectura compartida moi interesante. Aceptou encantada a nosa invitación e nós agradecemos a súa presenza. O relato que elixiu titúlase "Confesión" e forma parte do libro de Fran Alonso, "Cartas de amor", onde as protagonistas do amor ou desamor son mulleres en circunstancias dramáticas ou complicadas, que reflicten vivencias de gran realismo que nos permiten tomar postura, aceptar ou cuestionar a realidade que vivimos. Neste caso contaba a soidade, temores, dúbidas e valentía dunha moza que acepta e fala da súa homosexualidade a través dunha carta dirixida a unha amiga.

Do recibimento encargáronse alumnos e alumnas de 1º ESO recén chegadxs ao noso Centro, que nos revelaron boas aptitudes musicais e de lectura, e nós agradecémoslles a súa participación entusiasta.

No coloquio posterior, Rocío comentou que a súa intención era ler un fragmento de "Los juegos del hambre", pero preferiu escoller un texto en galego para a ocasión. Ademais de responder amablemente a todas as preguntas que o alumnado lle quixo facer. E, como non, lembramos que Rocío estivera hai tres anos de acompañante nun Tamén Len invitada con alumnxs de 4º de Primaria, xs mesmos que este curso acaban de chegar a 1ºESO.

Destacar que nos deixou de agasallo na biblioteca para todxs vós, un par de libros de literatura xuvenil, de Agustín Fdez. Paz.

 

Foi un bo comezo de animación á lectura, sen dúbida!