24 de outubro: Día das Bibliotecas

     Hoxe conmemoramos o Día das Bibliotecas cun progama de radio especial no que alumnado do noso equipo de voluntariado e club de lectura leu textos do noso cancioneiro popular. Ademais acompañamos o recitado con música en galego que mesturan en moitos casos a tradición e a modernidade. Podedes ver o programa completo na nosa canle de youtube Onda Raia Pedras Rubias. Aquí vos deixamos o enlace: Día das Bibliotecas

Tamén vos deixamos unha mostra fotográfica. Grazas a toda a rapazada que o fixo posible.

NOVA SESIÓN DO CLUB DE LECTURA

 Tivemos hoxe unha nova sesión do club de lectura na que comentamos dúas obras teatrais: A derradeira bala e O achado do castro. Comentamos os seus argumentos e personaxes e dramatizamos algunhas escenas. Son obras que gustaron moito e que axudaron a que o alumnado vaia descubrindo o xénero teatral desde outra perspectiva. Agardamos unha próxima reunión pronto. 

HOMENAXE A BEGOÑA GIL GONZÁLEZ

    Hoxe, con motivo da conmemoración do Día das escritoras, dedicamos unha emotiva homenaxe a Begoña Gil González, escritora salcedense falecida este verán. Ela participou no noso club de lectura no curso 22-23 e visitounos de novo para participar no Tamén Len uns meses despois. Autora da novela negra Esto no es  el CSI e outros dous títulos nos que converteu en personaxe colectivo a Salceda e as súas xentes, creou un vínculo especial co alumnado do club de lectura que leran a súa obra. Eles e elas foron os encargados de dedicarlle unhas palabras e dramatizar uns fragmentos das súas obras. Ademais creamos un recuncho lector co seu nome no que exporemos literatura escrita por mulleres. Grazas a todos e todas por asistir e unha vez máis dámosche as grazas Begoña polo teu marabilloso sorriso que sempre nos acompañará. Aquí van unhas fotiños do evento. 

RETOMANDO CLUB LECTURA E TAMÉN LEN

 Estamos de novo en marcha e retomando as nosas citas lectoras. Realizamos a primeira reunión do club de lectura o 30 de setembro na cal decidimos comezar lendo teatro xa que este curso a Biblioteca Escolar sae a escena! A rapazada de 1º e 2º ESO leu O achado do castro, un clásico de Manuel Núñez Singala e os de 3º e 4º A derradeira bala de Fernando Castro Paredes, obra gañadora do Premio Vidal Bolaño de Teatro, un premio convocado pola Editorial Galaxia e o equipo de dinamización lingüística do IES Ribeira do Louro e colaboración do Concello do Porriño desde o ano 2018. 

O xoves 3 de outubro arrancamos unha nova edición do noso Tamén Len no que tivemos de convidada a Lía Gil, mestra do CEP Altamira. Acompañouna a súa alumna Katia Vaqueiro Vila que cursa 6º de primaria e que é autora do libro infantil escollido para a ocasión, Juana y las galletas. Aquí vos deixamos unhas fotiños do acto.