O luns 19 de decembro tivemos no centro á escritora e xornalista Eva Mejuto durante as dúas sesións da tarde.
Na primeira sesión, reuniuse co alumnado de 2º ESO, xa que estes leran durante a 1ª avaliación a novela 22 segundos; na segunda, o encontro foi co alumnado de 3º ESO, que fixera a lectura de A ladroa da biblioteca de Meirás.
Resultou un fermoso encontro no que a escritora, ademais de responder a todas as preguntas que inquietaban ao alumnado, lles contou como desenvolve o seu labor de escritora, e lles falou de diferentes temas como a memoria histórica, a transexualidade...
O 20 de novembro tivemos a sorte de contar no Tamén len con Fernando Fernández, da editoral de Galaxia, ou Fernando da Picoña, como a el lle gusta que lle chamen, posto que é orixinario desta parroquia salcedense.
Para este encontro Fernando optou pola lectura dunha lenda de orixe liberiana titulada “O bastón feito dun rabo de vaca” do libro de lendas africanas Naiyakay, para facer unha reflexión final na que lle transmitiu ao alumnado a importancia de lembrar as persoas da familia e manter sempre vivo o seu recordo.
A continuación, Naira, alumna de 4º ESO, quixo pór a proba a Fernando e comprobar se realmente é picoñés de pura cepa facéndolle preguntas sobre o lugar, proba da que podemos afirmar que saíu bastante ben parado.
Agradecemos a súa presenza e a reflexión que compartiu con nós a través desta experiencia lectora.
O xoves 15 de decembro tivemos no centro á escritora e profesora de Lingua Galega Raquel Castro. Reuniuse co alumnado de 1º ESO xa que estes leron dúas das súas obras teatrais: Dormente e A formiga fóra do carreiro. Foi un fermoso encontro no que Raquel nos falou sobre o seu labor como escritora e tamén fixo unha pequena dramatización dalgúns fragmentos das obras cos alumnos e alumnas que se converteron en actores e actrices improvisados pero cun talento excelente. Moitas grazas Raquel pola túa visita e por inculcarnos o teu amor pola literatura e en especial polo teatro.
Neste último mes do primeiro trimestre temos xa algunhas recomendacións. Desta volta son dunha alumna de primeiro ESO e da nosa profe Loli, a cal nos achega un clásico universal que, tal como ela di, deberiamos ler e reler todos e todas. Adiante esas lecturas!!!!!
Deixámosvos aquí as recomendacións lectoras que nos deixaron algúns alumnos e alumnas no mes de novembro. Animádevos a descubrir as historias que elas e eles vos presentan. Cada mes iremos presentando novas recomendacións para que poidades ir aumentando as vosas lecturas.
Outro ano máis sumámonos aos berros de NIN UNHA MENOS! NIN UNHA MÁIS! neste 25 de novembro onde reclamamos unha sociedade máis igualitaria, tolerante e respectuosa que trate a todos e todas por igual e que non permita a violencia de xénero NUNCA MÁIS. Dende a biblio fixemos unha pequena exposición con obras que chaman á reflexión.
Comezamos as nosas recomendacións lectoras. Esta vez unha das nosas alumnas de 1º BACH (Lucía) e dous dos nosos integrantes do equipo de voluntariado da biblioteca (Vero de 1º ESO e Adrián de 2ºESO) fannos as súas achegas. Seguiremos en breve con novos títulos. Aquí vos deixamos as tres recomendacións desta ocasión:
O venres 11 de novembro celebramos un ano máis o noso magosto e samaín. Parabéns ao Equipo de Dinamización Lingüística polo seu labor. Xenial coma sempre. Dende a biblioteca colaboramos con moito gusto no evento. Aquí van unhas fotos da xornada co noso expositor de literatura terrorífica e das cabazas e receitas de outono que participaron nos concursos. Parabéns a 1º ESO C que resultou a aula gañadora. E tamén parabéns a todos os profes e alumnado que participou. 💪
Tras dous cursos de parada obrigatoria a causa da pandemia, por fin volvemos pór en marcha a nosa actividade "Tamén len". Como en ocasións anteriores contamos coa presenza dalgunha persoa da contorna próxima que vén compartir a súa experiencia lectora e facer recomendacións para animarnos a ler e gozar coas historias que se agochan nos libros. Nesta ocasión tivemos o pracer de recibir a Verónica Tourón, alcaldesa de Salceda de Caselas. Presentou e leu un fragmento da obra Anagnórise de María Victoria Moreno, un clásico da literatura galega de principios dos 90 que naquel momento atrapou a Verónica. Animounos a ler, a loitar polos nosos soños e a atopar o camiño certo tal como lle ocorreu a ela tras a lectura da obra. Agradecemos a súa presenza e o tempo que dedicou a compartir con nós esta experiencia lectora.
.jpg)
.jpg)
Arrancamos un novo curso no noso club de lectura, Seareiros da palabra. A primeira sesión tivo lugar o 24 de outubro, coincidindo co Día das Bibliotecas. Nela presentamos os libros que imos ler e aos integrantes deste curso, tanto profesorado como alumnado. Contamos con dous grupos de 1º e 2º ESO e un grupo de 4º ESO e agardamos que se sumen novos membros ao club de cómic e manga que arrancou o curso pasado.
Este curso o lema da biblio é "A biblioteca escolar ten a palabra" polo que nas lecturas escollidas veremos como o poder das palabras está presente na resolución de conflitos e na descuberta de emocións. Deixamos aquí unha fotiño dalgúns dos títulos que se lerán.
Hoxe luns 24 conmemórase o Dia Internacional das Bibliotecas, que busca promover e celebrar a importancia destes edificios para a cultura humana, as súas crenzas e os seus escritos. Desde 1997 xorde esta iniciativa da man da Asociación Española do Libro Infantil e Xuvenil, en lembranza da destrución da Biblioteca de Saraxevo que puido ser reconstuída e aberta de novo en 2014. No noso IES decidimos crear este pequeno espazo no que colocamos roliños de papel que conteñen fragmentos de textos de diferentes autores e autoras (Domingo Villar, Rosalía de Castro, Pablo Neruda...), para agasallar a todos e todas os que quixeron coller un e gozar da súa lectura. Esperemos que así se animasen a seguir descubrindo e lendo. Ademais dende a radio e organizado polo Equipo de Dinamización Lingüística, tivemos un programa especial dedicado a este día onde o noso alumnado leu fragmentos da obra de Francisco Feernández del Riego, o autor homenaxeado en 2023 no Día das Letras Galegas. Grazas a todos e todas.Os andeis da biblioteca agárdanvos cheíños de historias e soños. Deixamos aquí unha mostra do traballo feito.
NOVO CURSO 2022-23 E NOVOS PROXECTOS. A nosa Calixtina comeza outra vez a súa andaina e vén cheíña de ilusión e ganas de facer cousiñas. Imos devagariño mais tentaremos ir presentándovos as novas adquisicións e actividades que nos agardan. Lembrade que un libro agocha mil historias e que é un bo compañeiro de viaxe. Nunca deixedes de soñar. Deixamos aquí un brevísimo pero intenso poema de Yolanda Castaño para ir adentrándonos na maxia das palabras. Este ano o noso lema será "A biblioteca escolar ten a palabra" así que encheremos de letras a nosa biblio e iremos conformando historias con elas que nos farán gozar e sentir.
💜
"Ti e eu seremos sempre dúas liñas paralelas"
Yolanda Castaño
Este curso, por motivos persoais da coordinadora da biblioteca, non lle demos moito pulo ao noso blog polo que queremos facer un pequeno resumo final a modo de memoria do que foron os clubs de lectura deste curso. É salientable a pouca afluencia de alumnado ao club este ano e esperamos que o próximo curso se retome con enerxía esta actividade lectora que axuda a compartir experiencias lectoras e a gozar e reflexionar en grupo con diferentes obras que se van presentando e seleccionando cada avaliación. Debido á escasa presenza de alumnado que formase parte do noso club dó foi posible contar cun club de 1ºda ESO reapartido en dous grupos a cargo respectivamente da profesora de galego Carme e da profesora de bioloxía Tania. Tamén contamos este ano como novidade cun club de manga e banda deseñada a cargo da profesora Cristina de inglés e do profesor Cristian de Educación Plástica. Neste caso comentáronse novidades e lecturas propias de alumnado e profesorado relacionadas co mundo manga, o anime e a banda deseñada.
As lecturas realizadas no club de lectura de 1º ESO foron as seguintes:
- Jules Verne e a vida secreta das mulleres planta de Ledicia Costas e Nata e chocolate de Alicia Borrás, no 1º trimestre.
- Vaiche boa! De Paul Jennings e Nata y chocolate invencibles de Alicia Borras, no 2º trimestre.
- Nómades, unha novela gráfica de Xosé Tomás e Percy Jackson, el ladrón del rayo de Rick Riodan, no 3º trimestre.
