NOVA ANDAINA 2023-24

Comezamos un novo curso un tanto especial. Mudámonos para un novo espazo dentro do IES e estamos de traslado polo que hoxe arrancamos a andaina da biblio co desexo de poder ter en breve máis fondos dispoñibles e a ludoteca en marcha. Mentres seguimos traballando coa mesma ilusión de sempre para que a nosa biblio poida seguir ofrecéndovos actividades e lecturas. Grazas pola vosa comprensión e paciencia e agardamos que nos sigades visitando.

Que sexa un bo curso para todos e todas e moito ánimo!!!! 

😃💪📕📕📙📘

ÚLTIMO TAMÉN LEN DO CURSO

 Hoxe celebramos a última sesión do Tamén Len deste curso. Tivemos o pracer de contar coa visita da ex-profe de Lingua Castelá Sonia Freijeiro que desempeñou o seu labor docente durante 15 anos no noso centro. Tróuxonos unha interesante lectura "En la otra orilla" de Olga Alonso e lembramos con ela anécdotas do tempo que pasou no IES. Foi un pracer contar coa súa presenza e pechar así as sesións deste curso cunha das persoas que promoveron a creación desta interesante actividade do Tamén Len. 

Aquí vos deixamos unhas fotiños que ilustran a sesión. Grazas Sonia. 

SEMANA DAS LETRAS GALEGAS

 Hoxe entregamos os premios ás gañadoras do Concurso de Marcapáxinas que foi convocado pola Biblioteca co gallo da celebración do Día das Letras Galegas dedicado este ano a Francisco Fernández del Riego, un dos principais referentes da cultura galega e ao cal lle debemos precisamente a creación deste día. O primeiro premio foi para Sabela Núñez de 1º C e o 2º premio para Vera Rodríguez de 1º D. Parabéns ás dúas polos vosos bonitos e orixinais deseños e grazas a todos e todas os/as que participastes. Aquí van unhas fotiños.

Durante a Semana das Letras Galegas realizáronse tamén diversas actividades como o encontro con Avelino González no Auditorio de Salceda de Caselas, o maratón de lectura no souto o xoves 18 de maio, para facer ao aire libre a lectura ininterrompida en voz alta da novela O cego de Pumardedón de Francisco Fernández del Riego. O venres 19 o alumnado de 3ºtivo a sorte de asistir a unha charla co ex-futbolista do Real Club Celta de Vigo, Sergio Álvarez, o cal incidiu na importancia da formación e do deporte ao longo da vida así como unha defensa da lingua galega como lingua nai que nos distingue dos demais. Ademais, na Aula Virtual habilitouse un espazo para as Letras Galegas no que se pode atopar material diverso sobre o autor.

TAMÉN LEN 24 DE MAIO

 Hoxe tivemos un Tamén Len moi especial xa que nos visitou o profe Raúl Francés que se xubilou este curso e que tanta pegada deixou no centro. Foi un pracer escoitar as súas verbas dándolle voz ao conto de Xosé Luis Méndez Ferrín, "O Suso", un dos relatos clásicos e cume na literatura galega que sempre provoca un arrepío.  Grazas Raúl por acompañarnos e poder gozar contigo do pracer da lectura. Deixamos unhas fotiños do encontro.

ACTIVIDADES DE ABRIL

Acabado abril achegamos aquí unhas fotiños das actividades que celebramos durante o mes.

Primeiramente, co gallo do Día do Libro que se celebrou o 23 de abril, celebramos unha nova edición do noso mercado de libros o luns 24. Partiparon alumnos e alumnas de diferentes cursos. Puideron intercambiar obras xa lidas por outras que achegou o propio alumnado ou que foron doadas por algunha profesora. Grazas a todas e todos por participar e agardamos poder realizar unha nova edición antes de fin de curso. Aquí deixamos unha mostra gráfica e animamos a todas e todas a seguir lendo e gozando coas múltiples historias que se agochan dentro dos libros.

O 28 de abril realizamos unha nova sesión do Tamén Len e contamos coa escritora salcedense Begoña Gil González, autora de Esto no es el CSI e Los deseos oscuros, libros que leu o alumnado do club de lectura de 4º ESO, ambas pertencentes ao xénero de novela negra e con fondo de humor e ambientadas en Luanova, nome ficiticio da vila que é perfectamente identificable con Slceda. Para o encontro a autora escolleu dúas lecturas que conteñen descricións con carácter humeorístico e que animan a gozar da literatura cun sorriso. Leu fragmentos de Historias de cronopios y famas de Julio Cortázar e seguidamente un fragmento dun clásico: Sin noticias de Gurb de Eduardo Mendoza. O alumnado do club de lectura aproveitou para que lle asinase as súas obras e volver falar con ela. Grazas Begoña. 

Tamén achegamos as que foron as recomendacións lectoras do mes de abril, tal como vimos facendo en meses anteriores. Desta vez Carmen, administrativa do centreo e Roberto, de 1º ESO achégannos as súas.  

E por último unha fotiño do noso expositor de libros co gallo da celebración do 23 de Abril, Día do libro.

DÍA DA POESÍA

Para conmemorar o Día da Poesía a Biblioteca do IES Pedras Rubias convocou un concurso de recitado de poemas.  A pesar de que o alumnado de 2º ESO está en Andorra e o de 1º de Bacharelato en Madrid o concurso tivo unha gran acollida e foron moitos os alumnos e alumnas que se animaron a participar.

Abriu o recital Esteban Oliveira de 3º A co poema “Moraima” de Celso Emilio Ferreiro; a continuación, foi a quenda de Fabio Mazzurco de 3º A que recitou un poema de Roberto Blanco Torres; seguidamente, Xoel Roque de 4º C declamou un fermoso poema da súa autoría titulado “Ángel en tierra”; despois, Vera Rodríguez de 1º D tamén recitou un poema creado por ela mesma e que leva por título “ Ao amencer”; posteriormente, un numeroso grupo de alumnas de 1º D cantou “Adiós ríos” de Rosalía de Castro; e para finalizar, Martina González de 1º C recitou un poema de Antonio García Teijeiro. 

Grazas a todas e todos por participar e por dar vida á poesía a través das vosas voces neste 21 de marzo. Parabéns aos gañadores e gañadora.

Aquí vos vai unha mostra gráfica do acto.

SEMANA DE ACTIVIDADES LECTORAS

   ESTA SEMANA TIVEMOS ACTIVIDADES LECTORAS MOI INTERESANTES:

O LUNS 13 RECIBIMOS A ANTÓN RIVEIRO COELLO PARA FALAR CO ALUMNADO DE 4º E DE 1º BACH SOBRE AS SÚAS OBRAS "O PARAISO DOS INOCENTES" E "AS RULAS DE BAKUNIN".  UN AUTOR CLÁSICO XA NA NOSA LITERATURA MÁIS RECENTE E QUE DEBEMOS LER. GRAZAS POLA SÚA CONVERSA TAN INTERESANTE.

O MÉRCORES 15 VOLTOU O NOSO "TAMÉN LEN", DESTA VEZ COA GRATA PRESENZA DE NOELIA VAQUEIRO, EX-ALUMNA DO CENTRO E GRAN AFECCIONADA Á LECTURA E ÁS VIAXES, RENDEULLE UNHA PEQUENA HOMENAXE A DOMINGO VILLAR COA LECTURA DUN FRAGMENTO DE "O ÚLTIMO BARCO" E VIAXAMOS CON ELA AOS DISTINTOS LUGARES QUE VISITOU NAS SÚAS VIAXES. 

SIGAMOS APAIXONÁNDONOS POLA LECTURA . AQUÍ VOS DEIXAMOS UNHA MOSTRA GRÁFICA.

8 DE MARZO: DÍA DA MULLER

Deixamos aquí unha mostra da exposición de libros que escollemos para conmemorar o Día da Muller e lembrar a importancia da loita necesaria a prol da igualdade para crearmos entre todas e todos unha sociedade máis xusta, na que non teña cabida ningún tipo de discriminación por causa de xénero. As mulleres do pasado e do presente puxeron e poñen as bases para que as mulleres do futuro poidan sentir que elas tamén contan. Tamén deixamos unha mostra da exposición de tarxetas cubertas polo alumnado sobre mulleres das súas familias por eles e elas escollidas nas que achegaban datos sobre a súa vida laboral e se sufriron ou non algún tipo de discriminación por causa do ser muller. Denominámola "As nosas mulleres de Salceda" e serve de homenaxe para todas elas. 

TAMÉN LEN: XESPI, POETA DE SALCEDA

 Hoxe no Tamén Len contamos coa presenza de Xespi, poeta de Salceda e ademais pai dunha das nosas alumnas. Tivemos o gran pracer de escoitar a súa voz a través dunha fermosa selección de poemas por el escollidos que demostraron unha vez máis a forza da palabra poética e a necesidade de ler e "consumir" este xénero literario. Grazas por tan fermoso acto. 

23 de febreiro, DÍA DE ROSALÍA DE CASTRO

 A nosa homenaxe a Rosalía. No seu día lembramos a súa figura e a importancia que ten para a nosa cultura. 

Hoxe hai 186 do seu nacemento.