Certame Literario: FÓRMULAS DE BO AMOR.

“LABORATORIO DO BO AMOR”

Para conmemorar o Día dos Namorados, convocamos un concurso de escrita dende a Biblioteca Calixtina, en colaboración cos Dpts. de CCNN e Lingua Galega, coa idea de animarvos a expresar o que pensades en positivo sobre as relacións amorosas, que ingredientes ou “fórmulas” son as indicadas para que o “experimento” teña un final feliz. Ademais, podedes expresarvos en calquera lingua que dominedes.

Sabendo que estamos condicionados moitas veces por unha maneira errrada de entender as relacións interpersonais e sentimentais, cremos que é importante facer una reflexión sobre os “asuntos do corazón”; por iso queremos aproveitar a ocasión para idear e construír un mural onde plasmar un particular “LABORATORIO DO AMOR”, e onde a “Química do AMOR” quede enchida dos efluvios desprendidos dos experimentos que cada un de nós é quen de formular cos “ingredientes esenciais”. Creando as mellores “FÓRMULAS DE BO AMOR”.

Formular é receitar, prescribir, manifestar, expor con claridade e precisión. Unha fórmula é un medio práctico para resolver un asunto complicado, é una receita na que se indican os elementos que se deben empregar na curación de algo ou alguén, é una expresión matemática que resume os cálculos necesarios para a resolución dun problema e que serve como regra de uso para eses casos, é a representación simbólica, mediante letras e números, da composición dunha substancia química. É, ante todo, pensar a mellor das vidas para cadaquén, e para todxs, porque tamén podemos pensar o que hai, no amor, de colectivo…

Unha vez aclarado o que debemos facer, poñámonos a inventar e formular as mellores receitas para acadar o BO AMOR, non esquezamos que a experiencia vale un grao (como adoita dicirse), e teñamos en conta o que sabemos que funciona e o que non, por iso é moi importante elixir ben os elementos que provocan reaccións positivas e deixar fóra os que orixinan reaccións negativas, explosiónsssssssss destrutivas!!!!

Lembrade os conceptos que relacionamos co BO TRATO e que están expresados no seu mural: respecto, igualdade, dignidade, liberdade, amizade, equilibrio, benquerencia, amabilidade, compañeirismo, agarimo, compromiso, empatía, lealdade, coidado, asertividade, solidariedade, feminismo, comprensión, bo amor…, e deixemos fóra os negativos, que todxs sabemos cales son…, non si?

Paralelamente, ofreceremos neste blog, certos recursos relacionados, que poden servir para acadar unha boa educación sentimental: textos, videos, cancións, poemas… Ademais de poder adicar tamén cancións ou música na RADIO ESCOLAR, seguindo a liña do Bo Amor.

 -------------------- * --------------------

BASES DO CONCURSO “FÓRMULAS DE BO AMOR”

Podedes participar no CONCURSO “FÓRMULAS: A QUÍMICA DO BO AMOR”, ao longo deste trimestre de primavera que asoma, para pensar nas mellores receitas ou fórmulas para acadar fantásticas, magníficas, marabillosas, en definitiva, boas relacións sentimentais.

Para iso non tedes máis que formulalas así, por exemplo:

A = I + R 

-Especificando que: A é amor, I é igualdade, R é respecto; usando as variantes e elementos que consideredes esenciais na fórmula que queredes proponer e compartir.

-E usando calquera letra, número, símbolo, signo.

-Dándolle un ton poético ou científico, fantástico ou realista …

-En calquera lingua que dominedes.

-Serán escritas sobre corazóns de cores seguindo este modelo:

     (recortades un corazón no material e cor que queirades (como moi grande folio A4, ou menos)onde escribiredes a vosa fómula, ese corazón terá outra parte en forma de ronsel ou etiqueta a un lado, onde explicades a clave para entender dita fórmula)

-Que presentaredes sen nome, cun pseudónimo escrito por detrás, cos datos en sobre pechado e por fóra só ese pseudónimo ou sobrenome. Entregaranse nos recreos na Biblioteca, ata o 12 de marzo.

-Unha vez formuladas colocarémolas no “LABORATORIO DO AMOR”, para ser “estudadas e experimentadas e ver a súa efectividade”.

-Será premiada a fórmula mellor valorada polo xurado, que estará composto por expertxs na “Ciencia do Bo Amor”.

-O PREMIO consistirá nunha CEA ROMÁNTICA PARA DOUS…

ANIMÁDEVOS E NAMORÁDEVOS BEN!!!!

VIÑETAS: UNHA OLLADA Á PAZ

Non quixemos deixar pasar a ocasión de celebrar o Día da Paz o 30 de Decembro, para botarlle "unha ollada á Paz", solidarizarnos en contra de toda violencia e a favor da liberdade de expresión. Por iso convocamos este concurso de viñetas, cuxo resultado foi a presentación de traballos variados, destacando a creatividade de moitos deles a partir de reflexións ben interesantes. A elección do mellor non é doada, o xurado terá dificil decidir...

  "La Muralla" poesía de Nicolás Guillén, poeta cubano, 

      interpretada por Ana Belén.

TEMPO DE ENTROIDO; "O Mundo Patas Arriba"

Venres de Entroido, ou Carnaval, en Salceda. Chove. Decisión: saímos e desfilamos igual aínda que chova. Debecemos por sentir a calor nestes tres días que preceden á Coresma, pero se resiste o "maldito tempo" sen darnos tregua; porén lanzámonos baixo as nubes e sobre o asfalto mollado que multiplica as cores co seu reflexo e redobra a ledicia, ao que engadimos paraugas de mil cores e globos de cor violeta reivindicando melloras no servizo pediátrico do municipio. 

O mundo "patas arriba", a ilusión de trastocar a realidade, transgedir, darlle a volta ás identidades, compartilo todo nunhas horas, poñer en ridículo a quen detenta o poder, facer coplas cos erros dos mandatarios, das autoridades competentes, e das miserias de uns e outros, ou de todxs nós...

Deixar atrás o inverno e anticipar a entrada da primavera que uliscamos no ambiente entre as mimosas floridas... Carnaval de carne, de praceres, de alimentos renovados nas vendimas e colleitas e matanzas, onde conviven sen maior conflito o entroido rural máis ancestral coas novas formas foráneas, importadas de Tenerife, de Brasil ou nin se sabe...; onde nenxs e vellxs, homes e mulleres, danzamos ao son dos variados instrumentos e músicas do mundo, de aquí e de acolá, soberbia mestizaxe, mascaradas, mascaritas, monicreques, choqueiros, monigotes, damas e cabaleiros, mecos e sardiñas enterradas ...no mar.

Aquí estamos resistindo... Pan e saúde!!!

DESCUBRE A BIBLIOTECA!!:

Dende o PRINT de 1º ESO queremos convidarvos a seguir as pegadas de cores e as palabras significativas que tentan expresar todo o que de pracenteiro ten a visita a espazos como a nosa biblioteca e a "fisgar" entre as páxinas dos libros; para descubrir unha Biblioteca "En Pé de Igualdade" que pretende dar a oportunidade de ofrecer mil e un recursos e actividades abertas a todas e todos. 

PASEN E VEXAN PEGADA A PEGADA...

Engadimos un video con este percorrido, que leva ata o muro que anuncia a  entrada á Biblioteca, onde a xeito de graffiti  plasmamos os obxectivos que pretendemos acadar.

Montaxe final de Rubén e música de "Los Coronas"

BO TRATO: POSTA EN ESCENA

Por fin fomos quen de levar a termo o plan proposto de implicar a todo o instituto -aula por aula- ademais de contar coa colaboración do Club de Lectura e do profesorado e demais adultos do Centro, que quixeron participar animados na montaxe dunha posta en escena por cada un dos grupos para posicionarnos en defensa do BO TRATO, partindo de ideas e actitudes pensadas sempre en positivo. 
Dende Biblioteca, Print, Orientación, Titorías, Ética e Edu. Cidadanía, estivemos especialmente implicadas para encauzar, compartir e consensuar as ideas que ían xurdindo nas diferentes aulas e darlles forma para fotografar. Houbo certas demoras e retrasouse máis do debido, pero o obxectivo era facelo con todo o alumnado e persoal do centro.

O interesante é que deste xeito participamos todas e todos e a verdade é que houbo variedade de propostas e de boas ideas para plasmar en cada fotografía. 

Deixamos enlace ao post do blog dos SiareirosdaPalabra, onde colgamos tamén o video feito:

 ... EnLEate co BO TRATO!

Nunha entrada anterior explicamos xa a dinámica da actividade, agora só queremos deixar constancia gráfica e que filtre nos poros de cadaquen esta mensaxe; 

pois unha imaxe e un bo lema valen máis que mil palabras...

PRINT: "EN PÉ DE IGUALDADE". ACTIVIDADES REALIZADAS.

"EN PÉ DE IGUALDADE" é o lema que guía as actividades e labouras de aprendizaxe que este curso levamos facendo dende a Biblioteca Calixtina na hora do PRINT, nos 3 grupos de 1º ESO, coa Formación de Usuarios e a Educación Documental e Dixital.

Comezamos cun achegamento á nosa Biblioteca, á súa organización, a aprender a moverse por ela e a ter información de todas as actividades que nela podemos facer todxs participando abertamente. Sempre hai alumnado de 1º ESO que se brinda para colaborar voluntario nos recreos e quen tamén nutre as filas do Club de Lectura.

Sensibilizamos ante aspectos e circunstancias que consideramos de base para formar parte da nosa sociedade, coas súas complexidades, e para aprender a entender a realidade; pero sobre todo, o noso obxectivo é basear as actividades ou investigacións que fagamos na consecución da igualdade e o respecto entre homes e mulleres, entre grupos sociais, entre diversas culturas, na busca dunha convivencia positiva en liberdade.

No 1º Trimestre, cada grupo participou en 2 actividades:

1-Elaboración de ESLOGÁNS de creación propia que escribimos sobre pés de cores para poñer dende a entrada do instituto, todo seguido pola parede do corredor, ata a porta da Biblioteca, animando a usala e á lectura... Estas pegadas tan animosas acaban diante dun "MURO cun GRAFFITI para descubrir unha BIBLIOTECA que: le, ecoita, fala, comprende, coopera, abre, oferta recursos, colabora, escribe, visita, acolle, cuestiona, indaga, curiosea, debate, iguala, respecta...; sendo este un bo xeito de transmitirlles e analizar con eles os obxectivos e a identidade da nosa BE. Agradecemos a Nacho, profe de plástica a súa colaboración e creatividade para materializar os nosos desexos e visións.

2-Tamén traballamos en cada grupo, na creación dun lema ou motivo no que basearnos en contra dos malostratos e da violencia, e comezamos a idear unha posta en escena -coas cores significativas violeta e laranxa, trastocando roles, defendendo a igualdade e o respecto para acadar a liberdade persoal- para facer unha foto de grupo sensibilizándonos e defendendo o BO TRATO, pensando en positivo, para participar despois no mural onde serán expostas todas as fotos, as de cada grupo do Centro. Están feitas xa e procederemos a amplialas para poder expoñelas neste mes.

MARCOS GÁNDARA NO TAMÉN LEN

Este pasado xoves 22 de xaneiro estivo entre nós Marcos Gándara, antigo alumno da 1ª promoción que cursou 4º ESO no IES Pedras Rubias. Dende aquela xa tivo tempo de estudar a carreira de Historia Contemporánea, Estudos americanos e Arquivística, facer un Máster de "Xestión Cultural" en Lugo e mostrar inclinación por diversas actividades. Na actualidade leva xa varios meses contratado polo Concello de Salceda para dinamizar varios proxectos culturais: ampliación do Arquivo da Imaxe (do que se está a crear unha páxina web onde colgar cantas imaxes se poidan recoller a través de todas as persoas que queiran contribuír para rescatar o patrimonio fotográfico local), ou posta en marcha dun Club de Lectura vinculado á Biblioteca Municipal, para o que nos pedira asesoramento e exemplares de libros á Biblioteca Escolar do noso Centro; intercambio de ideas que fixemos e seguiremos a facer gustosamente. 

Colabora en prensa (Galicia Confidencial) e revistas online, como Iwrite magazine, Hypérbole magazine; escribindo artigos sobre cultura, historia, futbol...; ademais de ter publicado tamén algún relato de ficción. Deste xeito, para compartir connosco elixiu un relato da súa autoría, que fixera por encargo, titulado "Volver a empezar" onde conta unha historia no contexto dunha sociedade de futuro indesexable, distópica. Podemos dicir que é una persoa inquieta, crítica e comprometida e que sabe mover o público e cuestionalo sobre a lectura que escoitamos, falando sobre as sociedades hipercontroladas, compartindo deste xeito un recreo moi interesante. (Deixamos enlaces ás revistas e ao relato clikando enriba deles).

A presentación do acto -como non-  correu a cargo de varias Siareiras da Palabra do noso Club de Lectura: Alba e Lucía, e das notas do 2º movemento de  "O inverno" de Vivaldi, interpretadas tamén por membros do noso Club: Bieito, Pablo, Carmen e Camila, trombón, trompa e flautas. Houbo un amable e nutrido público atento ao acto, a quen agradecemos sempre a súa presenza incondicional.

BO TRATO: CONTRA TODO TIPO DE VIOLENCIA // EN DEFENSA DA CONVIVENCIA PACÍFICA ENTRE IGUAIS

No trimestre anterior comezamos a andaina para promocionar o BO TRATO, primeiro contra a violencia machista, agora en defensa dunha convivencia pacífica que respecte a diversidade e a igualdade, e seguiremos esta liña vermella en febreiro para reflexionar sobre o sentimento e a experiencia do BO AMOR.

-EN DECEMBRO, no corredor creamos un espazo de BO TRATO, onde desgranar os conceptos esenciais relacionados sobre os que traballar: igualdade, respecto, dignidade, 
liberdade, compromiso, benquerencia, amizade, compañeirismo, cooperación, feminismos, asertividade, empatía, equilibrio, comprensión...

e a un lado deixamos o espazo que iremos armando coas fotografías feitas de cada grupo de alumnos e alumnas, por curso, ademais de unir a elas as do Club de Lectura e a das persoas adultas que traballamos neste Centro de Ensino: conserxe, administrativo, profes, encargada da cafetaría..., para poñer en evidencia o noso rexeitamento ante o maltrato, pero dende unha postura positiva como é a promoción do bo trato. Así cada grupo reflexionou sobre este asunto e chegou a unha idea, un eslogan ou  unha imaxe nas que basear a súa posta en escena comprometéndose todas e cada unha das persoas que aquí convivimos. Será agora en Xaneiro cando deamos colocado cada unha das fotografías ampliadas para completar o noso muro do BO TRATO. Por suposto que tamén creamos, a carón, un punto atractivo e cómodo para poder ollar os diferentes libros e filmes que recomendamos relacionados con esta temática.

-EN XANEIRO, e dado que estamos sendo asaltados por feitos violentos cada dous por tres, non queremos deixar pasar a ocasión de sensibilizarnos, implicarnos e facer unha reflexión a través dun CONCURSO DE VIÑETAS: UNHA OLLADA Á PAZ.

CONCURSO DE VIÑETAS

PARA UN XANEIRO DE PAZ

A biblioteca calixtina convoca:

Viñetas: unha ollada á paz

relacionadas:

 coa defensa da paz, do respecto, da liberdade de expresión, da convivencia na diversidade, da capacidade de ser críticos e de ter as mentes abertas, de defensa e valoración do humor gráfico…

bases:

quen así o desexe pode presentar unha viñeta de creación propia, orixinal, con liberdade de estilo, nun formato sobre papel (ou calquera outro material) de tamaño a4, Baixo pseudónimo escrito por detrás do traballo e os datos persoais (nome completo e curso) en sobre pechado só co pseudónimo (nome falso) por fóra.

prazo:

entregaránse(traballo e sobre) nos recreos na biblioteca ao longo deste mes de xaneiro e ata o día 29, para poder ser expostos

o día 30 de xaneiro, día internacional da paz

1º premio: -agasallo dun libro ilustrado ou de bd.

Animádevos a participar!!!!

-EN FEBREIRO, seguiremos esta liña de actuación para educar no BO AMOR, e facer unha necesaria análise do sentimento amoroso e os seus usos e abusos, malentendidos, sufrimentos, dependencias, etc.; coa finalidade de aprender a vivir os nosos sentimentos e paixóns dun xeito -a poder ser- equilibrado. Faremos un mural da "FÍSICA E QUÍMICA DO AMOR" e convocaremos para a ocasión un CONCURSO DE FÓRMULAS DE BO AMOR, para exercitar a expresión escrita.

UN PASEO POLA HISTORIA, A ARTE E A CULTURA A TRAVÉS DAS VISITAS AO CAMIÑO DE SANTIAGO, AOS PAZOS DE SALCEDA E A HOMENAXE AOS MÁRTIRES DE SOBREDO.

         Como o curso pasodo estivemos a traballar seguindo a senda que nos marcaron as Viaxes, pensamos que sería boa idea realizar no blog da BE un relato sobre as Saídas ou Actividades Complementarias e Extraescolares, que se fixeron dende diferentes Departamentos e que están moi arraigadas.

Que non poideramos facelo antes non é obstáculo para deixar constancia de actividades que funcionan moi ben todos os anos e que permiten a relación coa contorna e o achegamento ao noso patrimonio histórico-artístico. Ademais de estar en débeda co alumnado que participou daquela. Publicamos ao mesmo tempo estas 3 últimas entradas sucesivas e relacionadas.

         Destacamos pola súa importancia, boa dinámica, aproveitamento e interese para o alumnado, tres actividades que dalgún xeito nos levan a viaxar ao pasado e dende hoxe a comprender e valorar feitos históricos e artísticos que forman parte da nosa cultura. Sexa o caso do CAMIÑO DE SANTIAGO ou, a nivel local, o caso da visita aos PAZOS DE SALCEDA DE CASELAS e a HOMENAXE AOS MÁRTIRES DE SOBREDO.

         Os motivos didácticos e pedagóxicos que nos levan a organizar actividades complementarias e extraescolares para o alumnado son:

         -Contribuír ao desenvolvemento integral da persoa.

         -Potenciar as capacidades específicas de cada alumno/a,

          complementando as actividades curriculares.

         -Favorecer a convivencia, non só entre o alumnado, senón tamén entre

          alumnado-profesorado e coa contorna.

                           -------------------------- * ---------------------------

         -O CAMIÑO DE SANTIAGO é unha actividade organizada no 1º Trimestre para o nivel de 3º ESO, dende os Departamentos de Educación Física, Relixión e contando coa colaboración de CC.SS. É unha saída voluntaria de 2 días, fóra do horario lectivo, facendo dúas etapas do Camiño e a visita ao teito da Catedral de Santiago de Compostela.

         -A visita aos PAZOS DE SALCEDA DE CASELAS é unha actividade pensada para 4º ESO, que todos os anos visitan os Pazos de Picoña, Avalle e Pegullal, da man do Departamento de CC.SS. 

         -A HOMENAXE AOS MÁRTIRES DE SOBREDO trátase duha actividade interdisciplinar de 4º ESO, que serve de marco de convivencia porque é compartida cos  institutos de Tui: San Paio e Indalecio Pérez Tizón, e co alumnado de 6º do CEP. Altamira de Salceda. Ademais de ser organizada polos Departamentos de CC.SS. e Lingua Galega dos Centros mencionados, xa que se trata dun acto histórico-literario, onde están presentes textos e poemas alusivos e comprometidos coa situación do campesiñado e do agro galego.

Visitar os Pazos e Sobredo é un perfecto complemento e sírvenos para destacar a importancia do estudo da situación do campesiñado suxeito a foros e ao redor do papel da fidalguía, os señores dos Pazos; que traballamos neste 1º trimestre e permite entender uns feitos históricos relacionados entre si, e que conformaron a sociedade e a economía do lugar nun pasado cercano.

O CAMIÑO DE SANTIAGO: UNHA CRÓNICA

3º ESO. OUTONO 2013

            O día 24 de outubro partimos do IES Pedras Rubias hacia Arzúa. O traxecto durou sobre unha hora e media e deixounos algo máis adiante de Arzúa, pois chovía. O Camiño foi divertido, aínda que cansado e a chuvia non axudaba para nada. Afundíanse os pés na terra e os charcos semellaban ríos, ata as botas de montaña estaban enchoupadas (máis que botas eran peceiras)

            A xente que pasaba ao noso carón desexábanos “Boa Viaxe” ao que respondiamos “Igualmente”. Cando por fin logramos chegar ao albergue, duchámonos e cambiamónos. A cada un outorgáronnos unha cama e... contaron a tres de menos! Polo que dous compañeiros e maís eu tivemos que durmir con xente descoñecida pero moi simpática. De feito falamos cunhas mozas taiwanesas en inglés con moita graza. Tamén había andaluzas e un señor novazelandés e outras rapazas de Astorga.

            Algúns polo tarde saíron a visitar un pouco o lugar, namentres outros nos quedamos no albergue, pois había wifi, je, je...

Á hora de cear fomos ao bar-restaurante e a cada quen puxéronos o noso prato. Había dúas opcións: pasta ou filete. Terminamos de cear e regresamos ao albergue para deitarnos cedo. Ao día seguinte tivemos que amencer ás 7h da mañá para almorzar e partir de novo. Esta vez houbo maís sorte e non choveu, incluso saíu algún raio de sol. Comezamos o camiño e nun punto déronnos un bocata e de seguido continuamos. Cando faltaban dous quilómetros, o que máis e o que menos estaba morto de cansazo e ese par de quilómetros fixéronsenos eternos, pero cando chegamos sentimos a gloria e tirámonos no chan (literalmente). Comimos no Claustro Maior todos xuntos e despois nos deixaron deambular por Santiago un rato, ata que volvimos a reunírmonos para facer unha visita guiada aos teitos da Catedral. Volvimos ao autobús de camiño ao noso fogar e moitos pensamos: Al fin!, pero maís que pensalo dixémolo.

Alba Fernández López. 3ºB.

Fabiola Pérez López. 3ºA.

4º ESO VISITA OS PAZOS DE SALCEDA

PICOÑA, AVALLE E PEGULLAL

         Todos  os anos, no IES Pedras Rubias, organizamos unha actividade complementaria que consiste nunha visita aos Pazos de Picoña, Avalle e Pegullal, unha actividade que quedou fixada dada a súa importancia para o coñecemento directo do patrimonio monumental, cultural e histórico-artístico de Salceda de Caselas.

Está destinada ao alumnado de 4ºESO, organizada polo Departamento de CC.SS. e traballada na materia de Historia Contemporánea en relación ao tema da fidalguía, da propiedade da terra e das explotacións agrarias na Galicia moderna e contemporánea. Así mesmo permite un achegamento práctico ás formas da arquitectura barroca galega aplicada a estas construcións rurais pacegas, ou Casas Grandes.

A súa posible realización debemos agradecela á amabilidade das familias propietarias de cadanseu pazo, e ao papel de intermediario e de guía excepcional do mestre Manuel Prego Español, que cada ano –incluso xubilado- ten unha resposta afirmativa para nós e é quen de acompañarnos e sorprender ao alumnado coa súa información privilexiada, procedente do traballo de investigación sobre os pazos locais da súa autoría, que foi publicado polo Concello. ("Unha ollada á Historia de Salceda de Caselas")

O sentido da visita é activo e participativo por parte dos alumnos/as que teñen que cubrir in situ os datos dunha Ficha de Traballo elaborada polo propio Departamento de CC.SS., que lles permite fixar a atención e facer o seguimento das explicacións que lles van desvelar o significado de escudos e linaxes, formas arquitectónicas e escultóricas, tipo de explotación, modos de vida, pervivencia e actual función destas propiedades, estado de conservación, etc.

O achegamento ao outro lado destes muros, descobre para eles unha realidade fascinante e exclusiva, tanto no caso da “deconstrución” do Pazo da Picoña, obxecto da herdanza repartida (partixas) que levou á súa deteriorización e á aplicación de materiais propios do “feísmo galego” pemitidos ao longo do tempo; como no caso do coidado estado de conservación e uso dos Pazos de Avalle e Pegullal, que son mostra do aproveitamento para explotacións de vide ou de kiwi, respectivamente. Como nos comentaba a actual propietaria de Avalle, cando a súa familia decidiu comprar este pazo coas súas terras, o que lle deixaron foi un novo modo de vida, que valora extraordinariamente e ao que se adaptou encantada.

Queremos compartir con vós esta viaxe ao pasado da nosa localidade e difundila como actividade que reporta un desenvolvemento de competencias básicas a partir do coñecemento e valoración da realidade cercana.

Achegamos a Ficha de Traballo e un resumo da información relativa a cada pazo.

HOMENAXE AOS MÁRTIRES DE SOBREDO

   A HOMENAXE AOS MÁRTIRES DE SOBREDO trátase duha actividade interdisciplinar de 4º ESO, que serve de marco de convivencia porque é compartida cos  institutos de Tui: San Paio e Indalecio Pérez Tizón, e co CEP. Altamira de Salceda. Ademais de ser organizada polos Departamentos de CC.SS. e Lingua Galega dos Centros mencionados, xa que se trata dun acto histórico-literario, onde están presentes textos e poemas alusivos que evidencian a problemática situación vivida polo campesiñado e o agro galego, ao que lle adicamos un par de horas dunha fría mañá de outono.

         Todos os anos, coincidindo coa data do 28 de novembro, facemos unha lembranza dos feitos acontecidos a poucos quilómetros de nós, nun día 28 de novembro do ano 1922, relacionados coas loitas agrarias de comezo do século XX, que demandaban a Abolición ou a Redención dos Foros e que provocaron diversas represións co resultado, neste caso, da morte de tres campesiños/as e numerosos feridos, conmemorada cun MONUMENTO aos Mártires de Sobredo levantado en 1932 na época da II República por iniciativa das Sociedades de Agricultores e Gandeiros e os Sindicatos Labregos e Obreiros, demolido na represión falanxista no contexto da Guerra Civil de 1936, e recuperado en 1987 coa chegada da democracia. Espazo onde nos reunimos e relatamos o noso respecto ás vítimas da represión. Dita conmemoración permite á mocidade participar nun acto singular, nun lugar da memoria popular, nun acto de loita pola dignidade das persoas e por un mundo maís xusto e solidario.

            Tamén nos acompañan o mestre Paco González e Darío Vila Costas, o tesoreiro do Instituto de Estudos Agrarios Mártires de Sobredo (IEAMSO), que porta o estandarte da parroquia de Parderrubias, o único que se conserva do municipio. Data de 1913 e pertencía a Sociedade obreira e agrícola de Parderrubias e foi doado por un emigrante do lugar en Río de Xaneiro. Dende 2012 temos un acordo de colaboración co citado IEAMSO, aprobado en Claustro.

         Serve para saber que pasou e recuperar a nosa memoria histórica, como era a vida dos nosos devanceiros, como era a política e a sociedade do momento, cales eran as condicións de vida e o esforzo colectivo que fixeron. E o recordamos mediante textos históricos, poemas, música e flores, nun acto sinxelo pero cheo de significado.

         Están as palabras e versos de Rosalía de Castro, de Ramón Cabanillas, de Luís Seoane, Curros Enríquez, Álvarez Caccamo, Antón Avilés de Taramancos, Manuel Rivas, Manuel Portela Valladares, Tomás Rodríguez Sabio, e incluso os versos dun antigo alumno do IES Pedras Rubias: Brais González.

         O remate consta dunha ofrenda floral onde cada un de nós deixamos un caravel  ao son da Marcha do Antigo Reino de Galicia, interpretada en directo para a ocasión por un grupo de alumnos/as que tocan gaitas, tambores, pandeiros, panderetas, etc. Seguidamente é interpretado e cantado con solemnidade por todas as persoas presentes o Himno de Galicia.

Pero aínda queda un momento para disfrutar da charla e do intercambio de pareceres facendo a homenaxe culinaria ás exquisitas roscas das que damos conta nun pispás.

2013-11. 016. Rosa dos ventos. Sobredo 067 from biblosvivos on Vimeo.



2013-11. Sobredo. 066 from biblosvivos on Vimeo.



2013 Sobredo 068 from biblosvivos on Vimeo.



2013-11. Sobredo. from biblosvivos on Vimeo.



2013-11 Sobredo. from biblosvivos on Vimeo.

PREMIO ONDAS A PONTE... NAS ONDAS!

Non queremos deixar de facer unha mención especial dende este blog -aínda que xa foi concedido en decembro de 2014- ao premio Á MELLOR COBERTURA INFORMATIVA acadado pola actividade de Radio Escolar, PONTE... NAS ONDAS!, que durante 20 anos mantivo un programa radial a través das ondas, en diferentes centros educativos de ensino primario e secundario, na fronteira de Galicia e Portugal, entre eles no CEP Altamira e no noso IES Pedras Rubias de Salceda de Caselas, sostido pola Asociación Cultural e Pedagóxica Ponte... Nas Ondas!

 A intención ou obxectivo ao longo do tempo foi e é rescatar e difundir un rico patriminio oral, o Patrimonio Inmaterial transfronteirizo galego-portugués; laboura sostida pola iniciativa de mestres e profesores, e a participación dos escolares dos dous lados do Río Miño que aprenderon o uso dun medio tan entrañable, cercano e efectivo como é a radio, onde a palabra é instrumento fundamental de traballo. Ao longo de todo este tempo compartiron música, contos, teatro, xogos tradicionais...e máis; sempre coa intención de trasmitir a nosa cultura galega, portuguesa, brasileira, angoleña, mozambicana..., dende a conexión coa actualidade, e en contacto con outros pobos e outras culturas.

MARGA SOTO NO TAMÉN LEN DE DECEMBRO.

Acaba de estar connosco, hoxe no recreo, Marga Soto, dona da Libraría Lemos de aquí, de Salceda. Estivo moi ben acompañada por Juan, Andrea e Mireya, de 2º ESO, que fixeron unha completa presentación da nosa invitada.

Sabendo que estamos a traballar as Ciencias na Biblioteca, quixo ler un capítulo do libro "A evolución de Calpurnia Tate". Nel fala da relación que a protagonista ten co seu avó, e como, dende o respecto mútuo, comparten o amor polo descubrimento dos fenómenos naturais; el coa experiencia e a paixón que non diminúe coa idade, e ela coa curiosidade e a ansia xoven de saber e con todo por descubrir...

É un libro que este outono tamén estivemos lendo no Club de Lectura, e non deixamos de recomendalo.

Houbo tempo para o coloquio con Marga, quen nos falou da súa profesión de libreira, da que gusta moito, sobre todo polo trato coas persoas; e de como concilia o traballo co coidado dos seus fillos.

Quixo ser mestra, pero iso quedou atrás...